maana ki teri deed ke qaabil nahin hooñ main tu miraa shauq dekh miraa intizaar dekh

main chahta hooñ mohabbat meraa vo haal kare ki KHvaab men bhi dobara kabhi majaal na ho

kaun si baat hai tum men aisi itne achchhe kyun lagte ho

gale milnaa na milnaa to teri marzi hai lekin tere chehre se lagta hai teraa dil kar raha hai

mujh se mat poochho ke us shaKHs men kya achha hai achchhe achhon se mujhe meraa bura achha hai kis tarah mujh se muhabbat men koi jeet gaya ye na kah dena ke bistar men badaa achha hai

kal raat jo eendhan ke li.e kat ke giraa hai chidiyon ko bahut pyaar tha us boodhe shajar se

tujh ko kya ilm tujhe haarne waale kuchh log kis qadar sakht nadaamat se tujhe dekhte hain

tu badalta hai to be-saakhta meri aañkhen apne haathon ki lakeeron se uljh jaati hain

kis tarah mirii rooh hari kar gaya aaKHir vo zahar jise jism men khilte nahin dekha

ye kya ki vo jab chahe mujhe cheen le mujh se apne li.e vo shaKHs tadpata bhi to dekhooñ