ghar men ghushta hooñ to lagta hai ki registaan hai mere ik kamre men saare shahar bhar kii gard hai

meri duniya men koi cheez thikaane pe nahin bas tujhe dekh ke lagta hai ki sab achha hai

teraa chehra subh ka taara lagta hai subh ka taara kitna pyaara lagta hai tum se mil kar imli meethi lagti hai tum se bichhad kar shahad bhi khaara lagta hai

mujhe pahle pehal lagta tha zaati mas'ala hai main phir samjha mohabbat qaaynaati mas'ala hai parinde qaid hain tum chahchahaahat chahte ho tumhein to achha khaasa nafsyaati mas'ala hai

ye kahte ho tire jaane se dil ko chain aayega to jaata hooñ KHuda haafiz magar tum jhooth kahte ho

ajab andaaz se ye ghar giraa hai mira malba mire u uupar giraa hai

utaara dil ke varq par to kitna pachtaaya vo intisaab jo pahle bas ik kitaab pe tha

mumkin hai ki sadiyon bhi nazar aa.e na suraj is baar andhera mire andar se utha hai

yaad hai aanis pahle tum KHud bikhre the aaiine ne tum se bikhrna seekha tha

ga.e zamaane ki chaap jin ko samajh rahe ho vo aane waale udaas lamhon ki siskiyaan hain