ham apne dukh ko gaane lag ga.e hain magar is men zamaane lag ga.e hain kisi ki tarbiyat ka hai karishma ye aañsu muskuraane lag ga.e hain kahaanii rukh badalna chahti hai naye kirdaar aane lag ga.e hain ye haasil hai mirii KHaamoshiyon ka ki patthar aazmaane lag ga.e hain ye mumkin hai kisi din tum bhi aao parinde aane jaane lag ga.e hain jinhen ham manzilon tak le ke aa.e vahii rastaa bataane lag ga.e hain sharaafat rang dikhlaati hai daanish kaii dushman thikaane lag ga.e hain

musaafir ke raaste badalte rahe muqaddar men chalna tha chalte rahe mire raaston men ujaala raha diye us ki aankhoñ men jalte rahe koi phool sa haath kaandhe pe tha mire paanv sholoon pe jalte rahe suna hai unhen bhi hawa lag gaii hawaon ke jo rukh badalte rahe vo kya tha jise ham ne thukra diya magar umr bhar haath malte rahe mohabbat adavat vafaa be-rukhi kiraye ke ghar the badalte rahe lipt kar charaaghon se vo so ga.e jo phoolon pe karvat badalte rahe

poora dukh aur aadha chaand hijr ki shab aur aisa chaand din men vehshat bahl gaii raat hui aur niklaa chaand kis maqtal se guzra hogaa itnaa sehama sehama chaand yaadon ki aabaad gali men ghoom raha hai tanhaa chaand meri karvat par jaag utthe neend ka k itnaa kaccha chaand mere munh ko kis hairat se dekh raha hai bhola chaand itne ghane baadal ke peeche k itnaa tanhaa hogaa chaand aañsu roke noor nahaaye dil dariyaa tan sehra chaand itne raushan chehre par bhi suraj ka hai saaya chaand jab paani men chehra dekha tu ne kis ko socha chaand bargad ki ik shaakh hata kar jaane kis ko jhaanka chaand baadal ke resham jhoole men bhor samay tak soya chaand raat ke shaane par sar rakhe dekh raha hai sapna chaand sukhe patton ke jhurmut par shabnam thii ya nanha chaand haath hila kar ruksat hogaus ki soorat hijr ka chaand sehra sehra bhatk raha hai apne ishq men saccha chaand raat ke shaayad ek baje hain sota hogaa meraa chaand

munh ki baat sune har koi dil ke dard ko jaane kaun aawazon ke bazaaron men khaamoshi pahchaane kaun sadiyon sadiyon vahii tamasha rastaa rastaa lambi khoj lekin jab ham mil jaate hain kho jaata hai jaane kaun vo meri parchhaaien hai ya main us ka aaina hooñ mere hi ghar men rehta hai mujh jaisa hi jaane kaun jaane kya kya bol raha tha sarhad pyaar kitaaben KHoon kal meri neendon men chhup kar jaag raha tha jaane kaun kiran kiran alsata suraj palak palak khulti neenden dhee men dhee men bikhar raha hai zarra zarra jaane kaun

jab raat ki tanhaaii dil ban ke dhadkati hai yaadon ke dareechon men chilman si sarkati hai loban men chingaari jaise koi rakh jaa.e yuñ yaad tiri shab bhar seene men sulagti hai yuñ pyaar nahin chhupta palkon ke jhukaane se aankhoñ ke lifaafon men tahreer chamakti hai khush-rang parindon ke laut aane ke din aa.e bichhde hue milte hain jab barf pighalti hai shohrat ki bulan dii bhi pal bhar ka tamasha hai jis daal pe baithe ho vo toot bhi sakti hai

soorat se is ki behtar soorat nahin hai koi deedaar-e-yaar si bhi daulat nahin hai koi aankhoñ ko khol agar tu deedaar ka hai bhooka chaudah tabaq se baahar nemat nahin hai koi saabit tire dehan ko kya mantiqi karenge aisi daleel aisi hujjat nahin hai koi ye kya samajh ke kadve hote hain aap ham se pee jaayega kisi ko sharbat nahin hai koi main ne kaha kabhi to tashreef laao bole m'azoor rakhiye waqt-e-fursat nahin hai koi ham kya kahein kisi se kya hai tariq apna mazhab nahin hai koi millat nahin hai koi dil le ke jaañ ke bhi sail jo ho to haazir haazir jo kuchh hai us men hujjat nahin hai koi ham shaayaron ka halka halka hai aarifon ka na-aashnaa-e-ma'ani soorat nahin hai koi deewaanon se hai apne ye qaul us pari ka khaaki o aatishi se nisbat nahin hai koi hazda hazaar aalam dam-bhar raha hai teraa tujh ko na chahe aisi khilqat nahin hai koi naazaan na husn par ho mehmaan hai chaar din ka be-e'tibaar aisi daulat nahin hai koi jaañ se aziz dil ko rakhta hooñ aadmi hooñ kyoon-kar kahooñ main mujh ko hasrat nahin hai koi yuñ bad kaha karo tum yuñ maal kuchh na samjho ham sa bhi khair-khwah-e-daulat nahin hai koi main paanch vaqt sajda karta hooñ is sanam ko mujh ko bhi aisi-vaisi khidmat nahin hai koi maa-o-shuma kah-o-meh karta hai zikr teraa is dastaan se khaali sohbat nahin hai koi shahr-e-butaan hai aatish allah ko karo yaad kis ko pukaarte ho hazrat nahin hai koi

vahii chitwan ki khoon-khwari jo aage thii so ab bhi hai tiri aankhoñ ki beemaarii jo aage thii so ab bhi hai vahii nashv-o-numa-e-sabza hai gor-e-ghareeban par hawaa-e-charkh-e-zangaari jo aage thii so ab bhi hai taalluq hai vahii taa-haal un zulfon ke saude se silaasil ki giriftaari jo aage thii so ab bhi hai vahii sar ka patkna hai vahii rona hai din bhar ka vahii raaton ki bedaari jo aage thii so ab bhi hai rivaaj-e-ishq ke aayein vahii hain kishwar-e-dil men rah-o-rasm-e-wafa jaarii jo aage thii so ab bhi hai vahii jee ka jalana hai pakaana hai vahii dil ka vo us ki garm-baazaari jo aage thii so ab bhi hai niyaaz-e-khaadimaana hai vahii fazl-e-ilaahi se buton ki naaz-bardaari jo aage thii so ab bhi hai firaq-e-yaar men jis tarah se marta tha marta hooñ vo rooh o tan ki be-zaari jo aage thii so ab bhi hai vahii sauda-e-kaakul ka hai aalam jo ki saabiq tha ye shab beemaar par bhari jo aage thii so ab bhi hai junoon ki garm-joshi hai vahii deewaanon se apni vahii daaghoon ki gul-kaari jo aage thii so ab bhi hai vahii bazaar-e-garmi hai mohabbat ki hanooz aatish vo yusuf ki khareedaari jo aage thii so ab bhi hai

khwaahan tire har rang men ai yaar humeen the yusuf tha agar tu to khareedaar humeen the be-daad ki mehfil men saza-waar humeen the taqseer kisi ki ho gunahgaar humeen the vaa'da tha humeen se lab-e-baam aane ka hona saa.e ki tarah se pas-e-deewaar humeen the kanghi tiri zulfon ki humeen par thii mukarrar aaina dikhaate tujhe har baar humeen the nemat thii tire husn ki hisse men hamaare tu kaan-e-malaahat tha khareedaar humeen the sauda-zada zulfon ka na tha apne siva ek azaad do-aalam tha girftaar humeen the tu aur ham ai dost the yak-jaan do qaaleb tha gair siva apne jo tha yaar humeen the bimaar-e-mohabbat tha siva apne na koi ik mustahiq-e-sharbat-e-deedaar humeen the be apne bahlati thii tabeeyat na kisi se dil-soz humeen the tire gham-khwaar humeen the ik jumbish-e-mizgaan se ghash aata tha humeen ko do nargis-e-beemaar ke beemaar humeen the jab chahte the lete the aaghosh men tum ko majboor se rah jaate the mukhtar humeen the ham sa na koi chaahne vaala tha tumhaara marte the humeen jaan se bezaar humeen the bad-naam mohabbat ne tiri ham ko kiya tha rusva-e-sar-e-koocha-o-bazaar ha men the dil thokren khaata tha na har gaam kisi ka ik KHaak men milte dam-e-raftaar humeen the bhadkaane se aatish ko jalane lage ya to altaaf-o-inaayat ke saza-waar humeen the

ye aarzoo thii tujhe gul ke roo-b-roo karte ham aur bulbul-e-betaab guftugoo karte payaambar na muyassar hua to khoob hua zabaan-e-ghair se kya sharh-e-aarzoo karte mirii tarah se mah-o-mehr bhi hain aawaara kisi habeeb ki ye bhi hain justuju karte hamesha rang-e-zamaana badalta rehta hai safed rang hain aaKHir siyaah moo karte lutate daulat-e-duniya ko may-kade men ham tilaai saagar-e-may nuqraai suboo karte hamesha main ne garebaan ko chaak chaak kiya tamaam umr rafoogar rahe rafu karte jo dekhte tiri zanjeer-e-zulf ka aalam aseer hone ki azaad aarzoo karte bayaaz-e-gardan-e-jaanaan ko subh kahte jo ham sitaara-e-seheri takma-e-guloo karte ye ka'be se nahin be-wajh nisbat-e-rukh-e-yaar ye be-sabab nahin murde ko qibla-roo karte sikhaate naalaa-e-shab-geer ko dar-andaazi gham-e-firaq ka us charkh ko adoo karte vo jaan-e-jaan nahin aata to maut hi aati dil-o-jigar ko kahaan tak bhala lahu karte na pooch aalam-e-bargashta-taalai aatish barasti aag jo baaraan ki aarzoo karte

dehan par hain un ke gumaan kaise kaise kalaam aate hain darmiyaañ kaise kaise zameen-e-chaman gul khilaati hai kya kya badalta hai rang aasmaañ kaise kaise tumhaare shaheedon men daakhil hue hain gul-o-laala-o-arghwaan kaise kaise bahaar aayi hai nashshe men jhoomte hain mureedaan-e-peer-e-mughaan kaise kaise ajab kya chhuta rooh se jaama-e-tan lute raah men kaarwaan kaise kaise tap-e-hijr ki kaahishon ne ki.e hain juda post se ustukhwaan kaise kaise na mud kar bhi be-dard qaateel ne dekha tadpate rahe neem-jaan kaise kaise na gor-e-sikandar na hai qabr-e-daara mite naamiyon ke nishaan kaise kaise bahaar-e-gulistaan ki hai aamad aamad khushi firte hain baagbaan kaise kaise tavajjoh ne teri hamaare maseeha tavaana ki.e na-tawan kaise kaise dil-o-deeda-e-ahl-e-aalam men ghar hai tumhaare li.e hain makaan kaise kaise gham-o-gussa o ranj-o-andoh-o-hirmaan hamaare bhi hain meherbaan kaise kaise tire kilk-e-qudrat ke qurbaan aañkhen dikhaaye hain khush-roo jawaan kaise kaise kare jis qadar shukr-e-ne'mat vo kam hai maze looti hai zabaan kaise kaise