ye kis tarah yaad aa rahi ho ye KHvaab kaisa dikha rahi ho ki jaise sach-much nigaah ke saamne khadi muskuraa rahi ho ye jism-e-naazuk ye narm baahen haseen gardan sidaul baazu shagufta chehra saloni rangat ghanera jooda siyaah gesu nasheeli aañkhen raseeli chitwan daraaz palken maheen abroo tamaam shokhi tamaam bijli tamaam masti tamaam jaadu hazaaron jaadu jaga rahi ho ye KHvaab kaisa dikha rahi ho gulaabi lab muskuraate aariz jabeen kushaada buland qamat nigaah men bijliyon ki jhil-mil adaaon men shabnami lataafat dhadakta seena mehkati saansen nava men ras ankhadiyon men amrit hama halaavat hama malaahat hama tarannum hama nazaakat lachak lachak gunguna rahi ho ye KHvaab kaisa dikha rahi ho to kya mujhe tum jala hi logi gale se apne laga hi logi jo phool jude se gir pada hai tadap ke us ko utha hi logi bhadakte sholon karkati bijli se meraa khirman bacha hi logi ghaneeri zulfon ki chaanv men muskuraa ke mujh ko chhupa hi logi ki aaj tak aazma rahi ho ye KHvaab kaisa dikha rahi ho nahin mohabbat ki koi qeemat jo koi qeemat ada karogi vafaa ki furqat na degi duniya hazaar azm-e-wafa karogi mujhe bahlne do ranj-o-gham se sahaare kab tak diya karogi junoon ko itnaa na gudgudao pakad luun daaman to kya karogi qareeb badhti hi aa rahi ho ye KHvaab kaisa dikha rahi ho

bahut KHoob-soorat ho tum bahut KHoob-soorat ho tum kabhi main jo kah doon mohabbat hai tum se to mujh ko khuda raa galat mat samajhna ki meri zaroorat ho tum bahut KHoob-soorat ho tum hain phoolon ki daali pe baanhe tumhaari hain KHaamosh jaadu nigaahen tumhaari jo kaañte hooñ sab apne daaman men rakh luun sajaun main kaliyon se raahen tumhaari nazar se zamaane ki KHud ko bachaana kisi aur se dekho dil mat lagana ki meri amaanat ho tum bahut KHoob-soorat ho tum kabhi jugnuon ki qataaron men dhoondha chamakte hue chaand-taaron men dhoondha khajaon men dhoondha bahaaron men dhoondha machalte hue aabsaaron men dhoondha haqeeqat men dekha fansaane men dekhana tum sa hañsi is zamaane dekhana duniya ki rangeen mehfil men paaya jo paaya tumhein apna hi dil men paaya ek aisi masarrat ho tum bahut KHoob-soorat ho tum hai chehra tumhaara ki din hai sunhara hai chehra tumhaara ki din hai sunhara aur is par ye kaali ghataon ka pahra gulaabon se naazuk mahakta badan hai ye lab hain tumhaare ki khilta chaman hai bikhero jo zulfen to sharmaae baadal farishte bhi dekhen to ho jaayen paagal vo paakizaa moorat ho tum bahut KHoob-soorat ho tum jo ban ke kali muskuraati hai akshar shab hijr men jo rulaati hai akshar jo lamhon hi lamhon men duniya badal de jo sha'ir ko de jaa.e pahluu ghazal ke chhupaana jo chahein chhupaai na jaa.e bhulaana jo chahein bhulaai na jaa.e vo pahli mohabbat ho tum bahut KHoob-soorat ho tum bahut KHoob-soorat ho tum bahut KHoob-soorat ho tum bahut KHoob-soorat ho tum

urdu hai mira naam main khusarav ki paheli main meer ki hamraaz hoon ghalib ki saheli dakkan ke wali ne mujhe go dii men khelaaya sauda ke qaseedon ne mira husn badhaaya hai meer ki azmat ki mujhe chalna sikhaaya main daagh ke aangan men khili ban ke chameli urdu hai mira naam main khusarav ki paheli ghalib ne bulan dii ka safar mujh ko sikhaaya haali ne muravvat ka sabq yaad dilaayaa iqbaal ne aaina-e-haq mujh ko dikhaaya mumin ne sajaai mire KHvaabon ki haveli urdu hai mira naam main khusarav ki paheli hai zauq ki azmat ki diye mujh ko sahaare chakbast ki ulfat ne mire KHvaab sanwaare faani ne sajaaye mirii palkon pe sitaare akbar ne rachaai mirii be-rang hatheli urdu hai mira naam main khusarav ki paheli kyun mujh ko banaate ho taassub ka nishaana maine to kabhi KHud ko musalmaan nahin maana dekha tha kabhi maine bhi KHushiyon ka zamaana apne hi watan men hoon magar aaj akeli urdu hai mira naam main khusarav ki paheli

ham milenge kahii ham milenge kahii ajnabi shahar ki KHvaab hoti hui shaahraaoon pe aur shaahraaoon pe phaili hui dhoop men ek din ham kahii saath hoge vaqt ki aandhiyon se ati saahtoon par se miTTi hataate huye ek hi jaise aañsu behaate huye ham milenge ghane janglo ki hari ghaas par aur kisi shaakh-e-naazuk par padte huye bojh ki dastaanon men kho jaayenge ham sanobar ke pedon ki nokiile patton se sadiyon se soye huye devataaon ki aañkhen chabo jaayenge ham milenge kahii barf ke bajuon men ghire parvaton par baanjh qabro men lete huye koh pemaaon ki yaad men nazm kahte huye jo pahaadoon ki aulaad thein aur unhen vaqt aane par maa baap ne apni aaghosh men le liya ham milenge kahii shah sulemaan ke urs men hauz ki seediyon par wuzu karne waalo ke shaffaaf chehron ke aage sangemarmar se aarasta farsh par pair rakhte huye aah bharte huye aur darakhton ko mannat ke dhaago se azaad karte huye ham milenge ham milenge kahii naarmendi ke saahil pe aate huye apne gum gashtarashto ki khaak-e-safar se ati vardiyo ke nishaan dekh kar maraakis se palte huye ek jarnel ki aakhiri baat par muskuraate huye ik jahaan jang ki chot khaate huye ham milenge ham milenge kahii roos ki daastaon ki jhoothi kahaanii pe aankhoñ men hairat sajaaye huye shaam lebnaan beirut ki nargisi chashmuro ki aamad ke nohoo pe hanste huye khooni kaziyo se maflooh jalbaaniyaan ke pahaadi ilaaqon men mehmaan ban kar milenge ham milenge ek murda zamaane ki KHush rang tahzeeb men zasb hone ke imkaan men ik puraani imarat ke pahluu men ujde huye laan men aur apne asiroon ki raah dekhte paanch sadiyon se veeraan zindaan men ham milenge tamannaon ki chhatriyon ke tale khwahishon ki hawaon ke bebaak boso se chhalni badan saumpane ke liye raaston ko ham milenge zameen se namoodaar hote huye aathvein barre azam men udte huye kaaleen par ham milenge kisi baar men apni bakaaya bachi umr ki paaymaali ke jaam haath men lenge aur ek hi ghoont men ham ye saiyal andar utaarenge aur hosh aane talak geet gaayenge bachpan ke qisse sunaata hua geet jo aaj bhi hamko azbar hai bedi be bedi tu thildi tapaiye pate paar kya hai pate paar kya hai ham milenge baagh men gaav men dhoop men chaanv men ret men dasht men shahar men masjidoon men kaliso men mandir men mehraab men church men mooslaadhaar baarish men bazaar men KHvaab men aag men gehre paani men galiyon men jungle men aur aasmaanon men kono makaan se pare gair aabda saiyaraaye aarzoo men sadiyon se khaali padi bench par jahaan maut bhi ham se dasto garebaan hogii to bas ek do din ki mehmaan hogii

"pandrah august" KHushiyon ke geet gaao ki pandrah august hai sab mil ke muskuraao ki pandrah august hai har samt qahqahe hain charaaghaan hai har taraf tum KHud bhi jagmagaao ki pandrah august hai har gosha-e-watan ko nikhaaro sanwaar do mehkaao lahlahaao ki pandrah august hai azaadi-e-watan pe hue hain kaii nisaar khaatir men in ko laao ki pandrah august hai rakho na sirf khanda-e-gul hain nigaah men kaanton ko bhi hansaao ki pandrah august hai roohen amaan-o-amn ki pyaasi hain aaj bhi pyaas in ki ab bujhaao ki pandrah august hai shama' khuloos-o-uns ki madhham hai raushni lau aur kuchh badhaao ki pandrah august hai ye ahd tum karo ki fasaadaat phir na hon haan aag ye bujhaao ki pandrah august hai khao qasam ki KHoon pilaaenge mulk ko dil se qasam ye khao ki pandrah august hai har haadse men ahl-e-watan mustaid rahen vo valvala jagao ki pandrah august hai ooncha rahe sharaafat-o-akhlaaq ka alam parcham buland uthao ki pandrah august hai ho dard-e-dil men jazba-e-hubb-e-watan fuzoon maftoon qalam uthao ki pandrah august hai