is se pahle ki tujhe aur sahaara na mile main tire saath hooñ jab tak mire jaisa na mile

dhoop men kaun kise yaad kiya karta hai par tire shahar men barsaat to hoti hogii

ye kahte ho tire jaane se dil ko chain aayega to jaata hooñ KHuda haafiz magar tum jhooth kahte ho

ham tire shauq men yuñ KHud ko ganwa baithe hain jaise bacche kisi tyaohar men gum ho jaayen

saath men tu mere do gaam to chal saka hai itnaa chalne se meraa kaam to chal saka hai tere dil men kisi shayar ki jagah to hogii is ilaake men meraa naam to chal saka hai

lutate hain vo daulat husn ki baawar nahin aata ha men to ek bosa bhi badi mushkil se milta hai

shab ko may khoob si pee subh ko tauba kar li rind ke rind rahe haath se jannat na gaii

aata hai jee men saaqi-e-mah-wash pe baar baar lab choom luun tira lab-e-paimaana chhod kar

aañsu hamaare gir ga.e un ki nigaah se in motiyon ki ab koi qeemat nahin rahi

mohabbat rang de jaati hai jab dil dil se milta hai magar mushkil to ye hai dil badi mushkil se milta hai