agar hai ishq saccha to nigaahon se bayaañ hogaa zabaan se bolna bhi kya koi izhaar hota hai

main chahta hooñ mohabbat meraa vo haal kare ki KHvaab men bhi dobara kabhi majaal na ho

main qissa mukhtasar kar ke zaraa neechi nazar kar ke ye kahtaa hooñ abhii tum se mohabbat ho gaii tum se

kabhi jo KHvaab tha vo pa liya hai magar jo kho gaii vo cheez kya thii

vaqt rehta nahin kahii tik kar aadat is ki bhi aadmi si hai

nazar bacha ke guzarte ho to guzar jaao main aaina hooñ meri apni zimmedaari hai

zindagi tere ta’qqub men ham itnaa chalte hain ki mar jaate hain

tamaam din ke dukhon ka hisaab karna hai main chahta hooñ koii mere aas-paas na ho

jama karta jo main aa.e hue sang sar chhupaane ke li.e ghar hota

vo sar bhi kaat deta to hota na kuchh malaal afsos ye hai us ne meri baat kaat dii