agar tum ho to ghabraane ki koi baat thodii hai zara si boonda-baan dii hai bahut barsaat thodii hai ye raah-e-ishq hai is men qadam aise hi uthte hain mohabbat sochne waalon ke bas ki baat thodii hai

vo afsaana jise anjaam tak laana na ho mumkin use ik KHoob-soorat mod de kar chhodna achha

bade naadaan ho tum bhi zara samjha karo baatein gale milkar jo roti hai bichhadkar kitna royegi

kitne aish se rahte honge kitne itraate honge jaane kaise log vo honge jo us ko bhaate honge

uski zulfen udaas ho jaa.e is-qadar roshni bhi theek nahin tumne naaraz hona chhod diya itni naarazgi bhi theek nahin

ye dukh nahin ki andhero se sulh kii hamne malaal ye hai ki ab subah kii talab bhi nahin

us se ik baar to roothoon main usii kii maanind aur meri tarah se vo mujh ko manaane aa.e

tujh ko kya ilm tujhe haarne waale kuchh log kis qadar sakht nadaamat se tujhe dekhte hain

kal raat jo eendhan ke li.e kat ke giraa hai chidiyon ko bahut pyaar tha us boodhe shajar se

kis tarah mirii rooh hari kar gaya aaKHir vo zahar jise jism men khilte nahin dekha