gale milnaa na milnaa to teri marzi hai lekin tere chehre se lagta hai teraa dil kar raha hai

teri aankhoñ men jo ik qatra chhupa hai main hooñ jisne chhup chhup ke teraa dard saha hai main hooñ ek patthar ki jise aanch na aayi tu hai ek aaina ki jo toot chuka hai main hooñ

ye pyaar teri bhool hai qubool hai main sang hooñ tu phool hai qubool hai tu roothegi to main manaaunga nahin jo rule hai vo rule hai qubool hai

itni milti hai mirii ghazalon se soorat teri log tujh ko mira mahboob samjhte honge

teri nigaah-e-naaz se chhoote hue darakht mar jaayen kya karen bataa sukhe hue darakht hairat hai ped neem ke dene lage hain aam pagla ga.e hain aapke choo men hue darakht

dekha hai bichhad kar ke bichhadne ka asar bhi mujh par to bahut hota hai us par nahin hota

sach bolne ke taur-tareeqe nahin rahe patthar bahut hain shahar men sheeshe nahin rahe

anjaam uske haath hai aaghaaz karke dekh bheege hue paron se hi parvaaz karke dekh

bhoolna chaaha agar us ko kabhi aur bhi vo yaad aaya der tak

sachchaai ko apnaana aasaan nahin duniya bhar se jhagda karna padta hai