vo be-vafa hai to kya mat kaho bura us ko ki jo hua so hua khush rakhe khudaa us ko nazar na aa.e to us kii talash men rahna kahiiñ mile to palat kar na dekhna us ko vo saada-khuu tha zamaane ke kham samajhta kya hawa ke saath chala le udii hawa us ko vo apne baare men kitna hai khush-gumaañ dekho jab us ko main bhi na dekhooñ to dekhna us ko abhii se jaana bhi kya us kii kam-khayaalii par abhii to aur bahut hogaa sochna us ko use ye dhun ki mujhe kam se kam udaas rakhe mirii du'aa ki khudaa de ye hausla us ko panaah dhoondh rahi hai shab-e-giraftaa-dil koii batao mire ghar ka raasta us ko ghazal men tazkira us ka na kar naseer ki ab bhula chuka vo tujhe tu bhi bhool ja us ko

KHaamosh lab hain jhuki hain palken dilon men ulfat nayi nayi hai abhii taqalluf hai guftagoo men abhii mohabbat nayi nayi hai abhii na aayengi neend tumko abhii na hamko sukoon milega abhii to dhadakega dil ziyaada abhii muhabbat nayi nayi hai bahaar ka aaj pehla din hai chalo chaman men tahal ke aayen fazaa men KHushboo nayi nayi hai gulon men rangat nayi nayi hai jo khandaani raeis hain vo mizaaj rakhte hain narm apna tumhaara lahjaa bataa raha hai tumhaari daulat nayi nayi hai zaraa sa qudrat ne kya nawaaza ke aake baithe ho pahli saf men abhii kyuuñ udne lage hawa men abhii to shohrat nayi nayi hai bamon ki barsaat ho rahi hai purane jaanbaaz so rahe hain ghulaam duniya ko kar raha hai vo jiski taqat nayi nayi hai

kaise usne ye sab kuchh mujhse chhupkar badla chehra badla rastaa badla baad men ghar badla main uske baare men ye kahtaa tha logon se meraa naam badal dena vo shaKHs agar badla vo bhi KHush tha usne dil dekar dil maanga hai main bhi KHush hooñ maine patthar se patthar badla maine kaha kya meri khaatir KHud ko badloge aur phir usne nazren badlein aur number badla

ab ke ham bichhde to shaayad kabhi KHvaabon men milen jis tarah sukhe hue phool kitaabon men milen Dhoondh ujde hue logon men vafaa ke motiye khazaane tujhe mumkin hai kharaabon men milen gham-e-duniya bhi gham-e-yaar men shaamil kar lo nasha badhta hai sharaaben jo sharaabon men milen tu KHuda hai na mira ishq farishton jaisa dono insaan hain to kyun itne hijaabo men milen aaj ham daar pe kheeche ga.e jin baaton par kya ajab kal vo zamaane ko nisaabon men milen ab na vo main na vo tu hai na vo maazi hai faraaz jaise do shaKHs tamannaa ke saraabo men milen

ik pal men ik sadi ka mazaa ham se poochiye do din ki zindagi ka mazaa ham se poochiye bhule hain rafta rafta unhen muddaton men ham qiston men khudkushi ka mazaa ham se poochiye aagaz-e-aashiqi ka mazaa aap jaaniye anjaam-e-aashiqi ka mazaa ham se poochiye jalte diyon men jalte gharo jaisi zau kahaan sarkaar raushni ka mazaa ham se poochiye vo jaan hi ga.e ki ha men unse pyaar hai aankhoñ ki mukhbirii ka mazaa hamse poochiye hansne ka shauq hamko bhi tha aap ki tarah hansiye magar hañsi ka mazaa ham se poochiye ham tauba kar ke mar ga.e be-maut ai khumaar tauheen-e-may-kashi ka mazaa ham se poochiye

koi bahaana koi kahaanii nahin chalegi mohabbaton men ghalat-bayaani nahin chalegi munaafiqon par vafaa ka tamgha nahin sajega KHaraab kapde pe kaamdaani nahin chalegi ha men ye duniya KHaraab samjhe ye uski marzi magar sabooton se chhedkhani nahin chalegi badon ke naksh-e-qadam pe bacche na chal sakenge puraani patri pe raajdhaani nahin chalegi agar vo apni zari ki saari pahan ke nikli to yaar logon pe sherwaani nahin chalegi vo mahfilein jo baghair ujrat ki khidmatein hain to kya vahaañ bhi ghazal puraani nahin chalegi bahut ziyaada bhi mutmain mat dikhaai dena bichhadte lamhon men shaadwaani nahin chalegi

ulte seedhe sapne pale baithe hain sab paani men kaanta dale baithe hain ik beemaar vasiyat karne vaala hai rishte naate jeebh nikale baithe hain abhii na jaane kitna hansna rona hai abhii to hamse pahle waale baithe hain sahab-zaada pichhli raat se ghaayab hai ghar ke andar rishte waale baithe hain andar dori toot rahi hai saanson ki baahar beema karne waale baithe hain

log kahte hain ki is khel men sar jaate hain ishq men itnaa khasaara hai to ghar jaate hain maut ko ham ne kabhi kuchh nahin samjha magar aaj apne bacchon ki taraf dekh ke dar jaate hain zindagi aise bhi haalaat banaa deti hai log saanson ka kafan odh ke mar jaate hain paanv men ab koi zanjeer nahin daalte ham dil jidhar theek samajhta hai udhar jaate hain kya junoon-khez masafat thii tire kooche ki aur ab yuñ hai ki KHaamosh guzar jaate hain ye mohabbat ki alaamat to nahin hai koi teraa chehra nazar aata hai jidhar jaate hain

wafaadaaro'n pe aafat aa rahi hai miyaan le lo jo qeemat aa rahi hai main us se itne wa'de kar chuka hooñ mujhe is baar ghairat aa rahi hai na jaane mujh men kya dekha hai us ne mujhe us par mohabbat aa rahi hai badalta ja raha hai jhooth sach men kahaanii men sadaqat aa rahi hai mira jhagda zamaane se nahin hai mire aadhe mohabbat aa rahi hai abhii raushan hua jaata hai rastaa vo dekho ek aurat aa rahi hai mujhe us ki udaasi ne bataaya bichhad jaane ki sa'at aa rahi hai badon ke darmiyaañ baitha hua hooñ naseehat par naseehat aa rahi hai

bolta hai to pata lagta hai zakham uskaa bhi haraa lagta hai raas aa jaati hai tanhaaii bhi ek do roz bura lagta hai kitnii zalim hai mohajjab duniya ghar se niklo to pata lagta hai aaj bhi vo nahin aane vaala aaj ka din bhi gaya lagta hai bojh seene pe bahut hai lekin muskuraa dene men kya lagta hai mood achha ho to sab achha hai warna hansna bhi bura lagta hai