ye alag baat ki KHaamosh khade rahte hain phir bhi jo log bade hain vo bade rahte hain

koi dikkat nahin hai gar tumhein uljha sa lagta hooñ main pahli martaba milne men sabko aisa lagta hooñ zaroori to nahin ham saath hain to koi chakkar ho vo meri dost hai aur main use bas achha lagta hooñ

sochun to saari umr mohabbat men kat gaii dekhooñ to ek shaKHs bhi meraa nahin hua

agar tum ho to ghabraane ki koi baat thodii hai zara si boonda-baan dii hai bahut barsaat thodii hai ye raah-e-ishq hai is men qadam aise hi uthte hain mohabbat sochne waalon ke bas ki baat thodii hai

shaakhon se toot jaayen vo patte nahin hain ham aandhi se koi kah de ki auqaat men rahe

vo na-samajh mujhe patthar samajh ke chhod gaya vo chahta to sitaare taraashta mujh se

ye mujhe neend men chalne ki jo beemaarii hai mujh ko ik khwaab-sara apni taraf kheenchti hai

main to KHud bikne ko bazaar men aaya hua hooñ aur dukaan-daar khareedaar samjhte hain mujhe

main bikhar gaya to sanwar gaya mere munsifo ko ye dukh raha vahii faisla mere haq men tha jo mere KHilaaf kiya gaya

us ek khat ne sukhnavar banaa diya mujh ko vo ek khat ki jo likkha nahin gaya mujh se