agar hai ishq saccha to nigaahon se bayaañ hogaa zabaan se bolna bhi kya koi izhaar hota hai

koi haseen badan jin ki dastaras men nahin yahii kaheinge ki kuchh faaeda havas men nahin

ghar men bhi dil nahin lag raha kaam par bhi nahin ja raha jaane kya KHauf hai jo tujhe choom kar bhi nahin ja raha raat ke teen bajne ko hai yaar ye kaisa mahboob hai jo gale bhi nahin lag raha aur ghar bhi nahin ja raha

ilaaj apna karate phir rahe ho jaane kis kis se mohabbat kar ke dekho na mohabbat kyun nahin karte

jaanta hooñ ki tujhe saath to rakhte hain kaii poochna tha ki teraa dhyaan bhi rakhta hai koi

mumkin ho aap se to bhula deejie mujhe patthar pe hooñ lakeer mita deejie mujhe

ye sochkar ki teri jabeen par na bal pade bas door hi se dekh liya aur chal pade dil men phir ik kasak sii uthi muddaton ke baad ik umr ke ruke hue aañsu nikal pade

vaqiaa'a kuchh bhi ho sach kehne men ruswaai hai kyun na KHaamosh rahoon ahl-e-nazar kahlaaun

tujh men kas-bal hai to duniya ko baha kar le ja chaai kii pyaali men toofaan uthaata kya hai

jalte hain ik charaaghh ki lau se kaii charaaghh duniya tire khayal se raushan hui to hai