chal aa ek aisi nazm kahooñ chal aa ek aisi nazm kahooñ jo lafz kahooñ vo ho jaa.e bas ashk kahooñ to ek aañsu tere gore gaal ko dho jaa.e main aa likkhoon tu aa jaa.e main baith likkhoon tu aa baithe mere shaane par sar rakhe tu main neend kahooñ tu so jaa.e main kaagaz par tere hont likkhoon tere honthon par muskaan aa.e main dil likkhoon tu dil thaa men main gum likkhoon vo kho jaa.e tere haath banaaun pencil se phir haath pe tere haath rakhoon kuchh ulta seedha farz karoon kuchh seedha ulta ho jaa.e main aah likhoon tu haay kare bechain likhoon bechain ho tu phir bechain ka be kaatoon tujhe chain zaraa sa ho jaa.e abhii ain likhoon tu soche mujhe phir sheen likhoon teri neend ude jab qaaf likhoon tujhe kuchh kuchh ho main ishq likhoon tujhe ho jaa.e

ham milenge kahii ham milenge kahii ajnabi shahar ki KHvaab hoti hui shaahraaoon pe aur shaahraaoon pe phaili hui dhoop men ek din ham kahii saath hoge vaqt ki aandhiyon se ati saahtoon par se miTTi hataate huye ek hi jaise aañsu behaate huye ham milenge ghane janglo ki hari ghaas par aur kisi shaakh-e-naazuk par padte huye bojh ki dastaanon men kho jaayenge ham sanobar ke pedon ki nokiile patton se sadiyon se soye huye devataaon ki aañkhen chabo jaayenge ham milenge kahii barf ke bajuon men ghire parvaton par baanjh qabro men lete huye koh pemaaon ki yaad men nazm kahte huye jo pahaadoon ki aulaad thein aur unhen vaqt aane par maa baap ne apni aaghosh men le liya ham milenge kahii shah sulemaan ke urs men hauz ki seediyon par wuzu karne waalo ke shaffaaf chehron ke aage sangemarmar se aarasta farsh par pair rakhte huye aah bharte huye aur darakhton ko mannat ke dhaago se azaad karte huye ham milenge ham milenge kahii naarmendi ke saahil pe aate huye apne gum gashtarashto ki khaak-e-safar se ati vardiyo ke nishaan dekh kar maraakis se palte huye ek jarnel ki aakhiri baat par muskuraate huye ik jahaan jang ki chot khaate huye ham milenge ham milenge kahii roos ki daastaon ki jhoothi kahaanii pe aankhoñ men hairat sajaaye huye shaam lebnaan beirut ki nargisi chashmuro ki aamad ke nohoo pe hanste huye khooni kaziyo se maflooh jalbaaniyaan ke pahaadi ilaaqon men mehmaan ban kar milenge ham milenge ek murda zamaane ki KHush rang tahzeeb men zasb hone ke imkaan men ik puraani imarat ke pahluu men ujde huye laan men aur apne asiroon ki raah dekhte paanch sadiyon se veeraan zindaan men ham milenge tamannaon ki chhatriyon ke tale khwahishon ki hawaon ke bebaak boso se chhalni badan saumpane ke liye raaston ko ham milenge zameen se namoodaar hote huye aathvein barre azam men udte huye kaaleen par ham milenge kisi baar men apni bakaaya bachi umr ki paaymaali ke jaam haath men lenge aur ek hi ghoont men ham ye saiyal andar utaarenge aur hosh aane talak geet gaayenge bachpan ke qisse sunaata hua geet jo aaj bhi hamko azbar hai bedi be bedi tu thildi tapaiye pate paar kya hai pate paar kya hai ham milenge baagh men gaav men dhoop men chaanv men ret men dasht men shahar men masjidoon men kaliso men mandir men mehraab men church men mooslaadhaar baarish men bazaar men KHvaab men aag men gehre paani men galiyon men jungle men aur aasmaanon men kono makaan se pare gair aabda saiyaraaye aarzoo men sadiyon se khaali padi bench par jahaan maut bhi ham se dasto garebaan hogii to bas ek do din ki mehmaan hogii

ramz tum jab aaogi to khoya hua paayogi mujhe meri tanhaaii men KHvaabon ke siva kuchh bhi nahin mere kamre ko sajaane ki tamannaa hai tumhein mere kamre men kitaabon ke siva kuchh bhi nahin in kitaabon ne badaa zulm kiya hai mujh par in men ik ramz hai jis ramz ka maara hua zehan muzdaa-e-ishrat-e-anjaam nahin pa saka zindagi men kabhi aaraam nahin pa saka

yaad hai pahle roz kaha tha yaad hai pahle roz kaha tha phir na kehna ghalti dil ki pyaar samajh ke karna ladki pyaar nibh aanaa hota hai phir paar lagana hota hai yaad hai pahle roz kaha tha saath chalo to poore safar tak mar jaane ki agli khabar tak samjho yaar KHuda tak hogaa saara pyaar vafaa tak hogaa phir ye bandhan tod na j aanaa chhod ga.e to phir na aanaa chhod diya jo teraa nahin hai chala gaya jo meraa nahin hai yaad hai pahle roz kaha tha ya to toot ke pyaar na karna ya phir peeth pe vaar na karna jab nadaani ho jaati hai nayi kahaanii ho jaati hai nayi kahaanii likh laaunga agle roz main bik jaaunga tere gul jab khil jaayenge mujh...ko paise mil jaayenge yaad hai pahle roz kaha tha bichhad ga.e to mauj udh aanaa waapas mere paas na aanaa jab koi jaakar waapas aa.e roye tadpe ya pachht aa.e main phir us..ko milta nahin hooñ saath dobara chaltaa nahin hooñ gum jaata hooñ kho jaata hooñ main patthar ka ho jaata hooñ

tu kisi aur hi duniya men mili thii mujhse tu kisi aur hi mausam ki mahak laai thii dar raha tha ki kahii zakham na bhar jaayen mere aur tu mutthiyaan bhar-bhar ke namak laai thii aur hi tarah ki aañkhen thii tere chehre par tu kisi aur sitaare se chamak laai thii teri awaaz hi sabkuchh thii mujhe monis-e-jaan kya karun main ki tu boli hi bahut kam mujhse teri chup se hi yahii mehsoos kiya tha maine jeet jayega teraa gham kisi roz mujhse shahar aawaazen lagata tha magar tu chup thii ye taalluq mujhe khaata tha magar tu chup thii vahii anjaam tha jo ishq ka aagaaz se hai tujhko paaya bhi nahin tha ki tujhe khona tha chali aati hai yahii rasm kaii sadiyon se yahii hota hai yahii hogaa yahii hona tha poochta rehta tha tujhse ki bataa kya dukh hai aur meri aankh men aañsu bhi nahin hote the maine andaaze lagaye ke sabab kya hogaa par mere teer taraazu bhi nahin hote the jiska dar tha mujhe maaloom pada logon se phir vo khush-bakht palat aaya teri duniya men jiske jaane pe mujhe tune jagah dii dil men meri qismat men hi jab khaali jagah likhi thii tujhse shikwa bhi agar karta to kaise karta main vo sabza tha jise raund diya jaata hai main vo jungle tha jise kaat diya jaata hai main vo dard tha jise dastak ki kamii khaati hai main vo manzil tha jahaan tooti sadak jaati hai main vo ghar tha jise aabaad nahin karta koi main to vo tha jise yaad nahin karta koi KHair is baat ko tu chhod bataa kaisi hai tune chaaha tha jise vo tere nazdeek to hai kaun se gham ne tujhe chaat liya andar se aaj kal phir se tu chup rahtii hai sab theek to hai

main kitnii sadiyon se tak raha hooñ ye kaayenaat aur is ki wus'at tamaam hairat tamaam hairat ye kya tamasha ye kya samaan hai ye kya ayaan hai ye kya nihaan hai athaah saaghar hai ik khala kana jaane kab se na jaane kab tak kahaan talak hai hamaari nazaron ki intiha hai jise samjhte hain ham falak hai ye raat ka chhalni chhalni sa kaala aasmaañ hai ki jis men jugnoo ki shakl men be-shumaar suraj pighal rahe hain shahaab-e-saaqib hai ya hamesha ki thandi kaali fazaaon men jaise aag ke teer chal rahe hain karod-ha noori barson ke faaslon men phaili ye kahkashaaen khala ghere hain ya khalaon ki qaid men hai ye kaun kis ko li.e chala hai har ek lamha karodon meelon ki jo masafat hai in ko aaKHir kahaan hai jaana agar hai in ka kahii koi aaKHiri thikaana to vo kahaan hai jahaan kahii hai sawaal ye hai vahaañ se aage koi zameen hai koi falak hai agar nahin hai to ye nahin kitnii door tak hai main kitnii sadiyon se tak raha hooñ ye kaayenaat aur is ki wus'at tamaam hairat tamaam hairat sitaare jin ki safeer kirnen karodon barson se raah men hai zameen se milne ki chaah men hai kabhi to aa ke karengi ye meri aañkhen raushan kabhi to aayegi mere haathon men raushni ka ek aisa daaman ki jis ko thaa men main ja ke dekhoonga in khalaon ke phaile aangan kabhi to mujh ko ye kaayenaat apne raaz khul ke suna hi degi ye apna aaghaaz apna anjaam mujh ko ik din bataa hi degi agar koi waiz apne mimbar se nakhwat-aamez lahzhe men ye kahe ki tum to kabhi samajh hi nahin sakoge ki is qadar hai ye baat gahri to koi pooche jo main na samjha to kaun samjhaayega aur jis ko kabhi na koi samajh sake aisi baat to phir fuzool thehri

ye aa.e din ke hangaa men ye jab dekho safar karna yahaañ jaana vahaañ jaana ise milnaa use milnaa hamaare saare lamhe aise lagte hain ki jaise train ke chalne se pahle railway-station par jal dii jal dii apne dabbe dhoondte koi musaafir hon jinhen kab saans bhi lene ki mohlat hai kabhi lagta hai tum ko mujh se mujh ko tum se milne ka khayal aa.e kahaan itni bhi furqat hai magar jab sang-dil duniya meraa dil todti hai to koi ummeed chalte chalte jab munh morati hai to kabhi koi khushi ka phool jab is dil men khilta hai kabhi jab mujh ko apne zehan se koi khayal inaam milta hai kabhi jab ik tamannaa poori hone se ye dil khaali sa hota hai kabhi jab dard aa ke palkon pe moti piroota hai to ye ehsaas hota hai khushi ho gham ho hairat ho koi jazba ho is men jab kahii ik mod aa.e to vahaañ pal bhar ko saari duniya peeche chhoot jaati hai vahaañ pal bhar ko is kath-putli jaisi zindagi ki dori toot jaati hai mujhe us mod par bas ik tumhaari hi zaroorat hai magar ye zindagi ki khoobsurat ik haqeeqat hai ki meri raah men jab aisa koi mod aaya hai to har us mod par main ne tumhein ham-raah paaya hai

ek patthar ki adhuri moorat chand taambe ke purane sikke kaali chaan dii ke ajab se zevar aur kaii kaanse ke toote bartan ek sehra mile zer-e-zameen log kahte hain ki sadiyon pahle aaj sehra hai jahaan wahin ik shahar hua karta tha aur mujh ko ye khayal aata hai kisi taqreeb kisi mehfil men saamna tujh se mira aaj bhi ho jaata hai ek lamhe ko bas ik pal ke li.e jism ki aanch uchatti si nazar surkh bindiya ki damak sarsaraahat tiri malboos ki baalon ki mahak be-khayaali men kabhi lams ka nanha sa phool aur phir door tak wahin sehra wahin sehra ki jahaan kabhi ik shahar hua karta tha

jaane kis ki talash un ki aankhoñ men thii aarzoo ke musaafir bhatkte rahe jitna bhi vo chale itne hi bich ga.e raah men faasle KHvaab manzil the aur manzilen KHvaab theen raaston se nikalte rahe raaste jaane kis vaaste aarzoo ke musaafir bhatkte rahe jin pe sab chalte hain aise sab raaste chhod ke ek anjaan pagdandi ki ungli thaa men hue ik sitaare se ummeed baandhe hue samt ki har gumaan ko yaqeen maan ke apne dil se koi dhoka khaate hue jaan ke sehra sehra samundar ko vo dhoondte kuchh saraabo ki jaanib rahe gaamzan yuñ nahin tha ki un ko khabar hi na thii ye samundar nahin lekin un ko kahii shaayad ehsaas tha ye fareb un ko mahw-e-safar rakkhega ye sabab tha ki tha aur koi sabab jo li.e un ko firta raha manzilon manzilon raaste raaste jaane kis vaaste aarzoo ke musaafir bhatkte rahe akshar aisa hua shehr-dar-shehr aur bastii bastii kisi bhi dariche men koi charaagh-e-mohabbat na tha be-rukhi se bharii saari galiyon men saare makaanon ke darwaaze yuñ band the jaise ik sard KHaamosh lehje men vo kah rahe hon muravvat ka aur meherbaani ka maskan kahii aur hogaa yahaañ to nahin hai yahii ek manzar samete the shehron ke pathreeli sab raaste jaane kis vaaste aarzoo ke musaafir bhatkte rahe aur k abhii yuñ hua aarzoo ke musaafir the jaltee sulagti hui dhoop men kuchh darakhton ne saa.e bichhaaye magar un ko aisa laga saa.e men jo sukoon aur aaraam hai manzilon tak pahunchne na dega unhen aur yuñ bhi hua mahki kaliyon ne KHushboo ke paighaam bheje unhen un ko aisa laga chand kaliyon pe kaise qanaat karen un ko to dhoondhna hai vo gulshan ki jis ko kisi ne abhii tak hai dekha nahin jaane kyun tha unhen is ka poora yaqeen der ho ya savera un ko lekin kahii aise gulshan ke mil jaayenge raaste jaane kis vaaste aarzoo ke musaafir bhatkte rahe dhoop dhalne lagii bas zaraa der men raat ho jaayegi aarzoo ke musaafir jo hain un ke qadmon tale jo bhi ik raah hai vo bhi shaayad andhere men kho jaayegi aarzoo ke musaafir bhi apne thake-haare be-jaan pairo'n pe kuchh der tak ladkhadaayenge aur gir ke so jaayenge sirf sannaata sochega ye raat bhar manzilen to unhen jaane kitnii miliin ye magar manzilon ko samjhte rahe jaane kyun raaste jaane kis vaaste aarzoo ke musaafir bhatkte rahe aur phir ik savere ki ujli kiran teergii cheer ke jagmaga degi jab an-ginat rahguzaron pe bikhre hue un ke naqsh-e-qadam aafiyat-gaahon men rahne waale ye hairat se majboor ho ke kaheinge ye naqsh-e-qadam sirf naqsh-e-qadam hi nahin ye to daryaft hain ye to ijaad hain ye to afkaar hain ye to ashaar hain ye koi raqs hain ye koi raag hain in se hi to hain aaraasta saari tahzeeb o taarikh ke vaqt ke zindagi ke s abhii raaste vo musaafir magar jaante-boojhte bhi rahe be-KHabar jis ko choo len qadam vo to bas raah thii un ki manzil digar thii alag chaah thii jo nahin mil sake us ki thii aarzoo jo nahin hai kahii us ki thii justuju shaayad is vaaste aarzoo ke musaafir bhatkte rahe

ajeeb qissa hai jab ye duniya samajh rahi thii tum apni duniya men jee rahi ho main apni duniya men jee raha hooñ to ham ne saari nigaahon se door ek duniya basaai thii jo ki meri bhi thii tumhaari bhi thii jahaan fazaaon men dono ke KHvaab jaagte the jahaan hawaon men dono ki sargoshiyaan ghuli theen jahaan ke phoolon men dono ki aarzoo ke sab rang khil rahe the jahaan pe dono ki juraton ke hazaar chash men ubal rahe thena vasvase the na ranj-o-gham the sukoon ka gahra ik samundar tha aur ham the ajeeb qissa hai saari duniya ne jab ye jaana ki ham ne saari nigaahon se door ek duniya basaai hai to har ek abroo ne jaise ham par kamaan taani tamaam peshaaniyon pe ubhri gham aur ghusse ki gahri shikne kisi ke lehje se talkhi chhalki kisi ki baaton men turshi aayi kisi ne chaaha ki koi deewaar hi utha de kisi ne chaaha hamaari duniya hi vo mita de magar zamaane ko haarna tha zamaana haara ye saari duniya ko maanna hi pada hamaare khayal ki ek si zameen hai hamaare KHvaabon ka ek jaisa hi aasmaañ hai magar puraani ye dastaan hai ki ham pe duniya ab ek arse se meherbaan hai ajeeb qissa hai jab ki duniya ne kab ka tasleem kar liya hai ham ek duniya ke rahne waale hain sach to ye hai tum apni duniya men jee rahi ho main apni duniya men jee raha hooñ