Ham ne us ko itnaa dekha jitnaa dekha ja sakta tha lekin phir bhi do aankhoñ se kitnaa dekha ja sakta tha

shaayad mujhe kisi se mohabbat nahin hui lekin yaqeen sab ko dilaata raha hooñ main

gale milnaa na milnaa to teri marzi hai lekin tere chehre se lagta hai teraa dil kar raha hai

ham vo hain jo KHuda ko bhool ga.e tum meri jaan kis gumaan men ho

koi dikkat nahin hai gar tumhein uljha sa lagta hooñ main pahli martaba milne men sabko aisa lagta hooñ zaroori to nahin ham saath hain to koi chakkar ho vo meri dost hai aur main use bas achha lagta hooñ

maqtal-e-shauq ke aadaab niraale hain bahut dil bhi qaateel ko diya karte hain sar se pahle

partav se jis ke aalam-e-imkaan bahaar hai vo nau-bahaar-e-naaz abhii raahguzaar men hai

pyaas jahaan ki ek biyaabaan teri sakhaawat shabnam hai pee ke utha jo bazm se teri aur bhi tishna-kaam utha

daaman jhatak ke vaadi-e-gham se guzar gaya uth uth ke dekhti rahi gard-e-safar mujhe

ye teraa gulistaan teraa chaman kab meri nava ke qaabil hai naghma mira apne daaman men aap apna gulistaan laata hai