koi dikkat nahin hai gar tumhein uljha sa lagta hooñ main pahli martaba milne men sabko aisa lagta hooñ zaroori to nahin ham saath hain to koi chakkar ho vo meri dost hai aur main use bas achha lagta hooñ

sochun to saari umr mohabbat men kat gaii dekhooñ to ek shaKHs bhi meraa nahin hua

muddatein guzar gayi hisaab nahin kiyana jaane ab kiske kitne rah ga.e ham

dil na-umeed to nahin naakaam hi to hai lambi hai gham ki shaam magar shaam hi to hai

ye mujhe chain kyun nahin padta ek hi shaKHs tha jahaan men kya

zindagi ka muqaddar safar-dar-safar aakhiri saans tak be-qaraar aadmi

naksha utha ke aur koi shahar dekhiye is shahar men to sab se mulaqaat ho gaii

ghee misri bhi bhej kabhi akhbaaron men kaii dinon se chaai hai kadvi ya allah

koi hindu koi muslim koi eesaai hai sab ne insaan na banne ki qasam khaai hai

ghar se masjid hai bahut door chalo yuñ kar len kisi rote hue bacche ko hansaaya jaa.e