mehrbaan ham pe har ik raat hua karti thii aankh lagte hi mulaqaat hua karti thii hijr ki raat hai aur aankh men aansoo bhi nahin aise mausam men to barsaat hua karti thii

teri soorat se hai aalam men bahaaron ko sabaat teri aankhoñ ke siva duniya men rakha kya hai

koi dikkat nahin hai gar tumhein uljha sa lagta hooñ main pahli martaba milne men sabko aisa lagta hooñ zaroori to nahin ham saath hain to koi chakkar ho vo meri dost hai aur main use bas achha lagta hooñ

ye alag baat ki KHaamosh khade rahte hain phir bhi jo log bade hain vo bade rahte hain

sochun to saari umr mohabbat men kat gaii dekhooñ to ek shaKHs bhi meraa nahin hua

jaisa dikhaai dene kii karte ho koshishein main khoob jaanta hooñ ki aise nahin ho tum

tumhaara pyaar to saanson men saans leta hai jo hota nashsha to ik din utar nahin jaata

raat to vaqt kii paaband hai dhal jaayegi dekhna ye hai charaaghon ka safar kitna hai

mohabbat ke gharo ke kacche-pan ko ye kahaan samjhen in aankhoñ ko to bas aata hai barsaatein badi karna

kya bataaun kaisa KHud ko dar-b-dar maine kiya umr bhar kis kiske hisse ka safar maine kiya tu to nafrat bhi na kar paayega is shiddat ke saath jis bala ka pyaar tujhse be-KHabar maine kiya