koi dikkat nahin hai gar tumhein uljha sa lagta hooñ main pahli martaba milne men sabko aisa lagta hooñ zaroori to nahin ham saath hain to koi chakkar ho vo meri dost hai aur main use bas achha lagta hooñ

ab lagta hai theek kaha tha ghalib ne badhte-badhte dard davaa ho jaata hai

vaqt rehta nahin kahii tik kar aadat is ki bhi aadmi si hai

kore kaagaz par ro rahe ho tum main to samjha padhe likhe ho tum kya kaha mujhse door jaana hai iska matlab hai ja chuke ho tum

nahin lagega use dekh kar magar KHush hai main KHush nahin hooñ magar dekh kar lagega nahin

nazarandaaz karne kii saza deni thii tujh ko tere dil men utar jaana zaroori ho gaya tha

jaake lautaa hai kahiin koii hawa ka jhonka tumne kya soch ke darwaaza khula rakkha hai

zaraa sa qatra kahii aaj agar ubharta hai samundron hi ke lehje men baat karta hai

chraagh ghar ka ho mehfil ka ho ki mandir ka hawa ke paas koi maslahat nahin hoti

kya bataaun kaisa KHud ko dar-b-dar maine kiya umr bhar kis kiske hisse ka safar maine kiya tu to nafrat bhi na kar paayega is shiddat ke saath jis bala ka pyaar tujhse be-KHabar maine kiya