tumhein husn par dastaras hai mohabbat wohabbat badaa jaante ho to phir ye batao ki tum us kii aankhoñ ke baare men kya jaante ho ye jugraafiya falsafa psychology science riyaazi waghera ye sab jaanna bhi ahem hai magar us ke ghar ka pata jaante ho

kisi ko ghar se nikalte hi mil gaii manzil koi hamaari tarah umr bhar safar men raha

ham vo hain jo KHuda ko bhool ga.e tum meri jaan kis gumaan men ho

bichadkar uskaa dil lag bhi gaya to kya lagega vo thak jaayega aur mere gale se aa lagega main mushkil men tumhaare kaam aaun ya na aaun mujhe awaaz de lena tumhe achha lagega

mujh se mat poochho ke us shaKHs men kya achha hai achchhe achhon se mujhe meraa bura achha hai kis tarah mujh se muhabbat men koi jeet gaya ye na kah dena ke bistar men badaa achha hai

hamaara kaam to mausam ka dhyaan karna hai aur us ke baad ke sab kaam shash-jahaat ke hain

main tujhse milne samay se pahle pahunch gaya tha so tere ghar ke qareeb aakar bhatk raha hooñ

shahr-e-jaan men vabaao'n ka ik daur tha main ada-e-tanaffus men kamzor tha

main apni maut se khilwat men milnaa chahta hooñ so meri naav men bas main hooñ nakhuda nahin hai

ye jism tang hai seene men bhi lahu kam hai dil ab vo phool hai jis men ki rang-o-boo kam hai