Top 20 Sher by Arzoo Lakhnavi

kis ne bhige hue baalon se ye jhatka pani jhum ke aai ghata tut ke barsa pani

wafa tum se karenge dukh sahenge naz uthaenge jise aata hai dil dena use har kaam aata hai

buri sarisht na badli jagah badalne se chaman mein aa ke bhi kanta gulab ho na saka

jo dil rakhte hain sine mein wo kafir ho nahin sakte mohabbat din hoti hai wafa iman hoti hai

bhole ban kar haal na puchho bahte hain ashk to bahne do jis se badhe bechaini dil ki aisi tasalli rahne do

khamoshi meri mani-khez thi ai aarzu kitni ki jis ne jaisa chaha waisa afsana bana dala

had se takraati hai jo shai wo palatti hai zarur khud bhi roenge gharibon ko rulane wale

shauq chadhti dhup jata waqt ghatti chhanw hai ba-wafa jo aaj hain kal be-wafa ho jaenge

dafatan tark-e-talluq mein bhi ruswai hai uljhe daman ko chhudate nahin jhatka de kar

khilna kahin chhupa bhi hai chahat ke phul ka li ghar mein sans aur gali tak mahak gai

hath se kis ne saghar patka mausam ki be-kaifi par itna barsa tut ke baadal dub chala mai-khana bhi

phir chahe to na aana o aan ban wale jhuta hi wada kar le sachchi zaban wale

tere to dhang hain yahi apna bana ke chhod de wo bhi bura hai bawla tujh ko jo pa ke chhod de

jis qadar nafrat badhai utni hi qurbat badhi ab jo mahfil mein nahin hai wo tumhaare dil mein hai

mohabbat nek-o-bad ko sochne de ghair-mumkin hai badhi jab be-khudi phir kaun darta hai gunahon se

jo kuchh tha na kahne ka sab kah gaya diwana samho to mukammal hai ab ishq ka afsana

khizan ka bhes bana kar bahaar ne mara mujhe do-rangi-e-lail-o-nahaar ne mara

sukun-e-dil nahin jis waqt se us bazm mein aae zara si chiz ghabrahat mein kya jaane kahan rakh di

wae ghurbat ki hue jis ke liye khana-kharab sun ke aawaz bhi ghar se na wo bahar nikla

har sans hai ek naghma har naghma hai mastana kis darja dukhe dil ka rangin hai afsana