chal aa ek aisi nazm kahooñ chal aa ek aisi nazm kahooñ jo lafz kahooñ vo ho jaa.e bas ashk kahooñ to ek aañsu tere gore gaal ko dho jaa.e main aa likkhoon tu aa jaa.e main baith likkhoon tu aa baithe mere shaane par sar rakhe tu main neend kahooñ tu so jaa.e main kaagaz par tere hont likkhoon tere honthon par muskaan aa.e main dil likkhoon tu dil thaa men main gum likkhoon vo kho jaa.e tere haath banaaun pencil se phir haath pe tere haath rakhoon kuchh ulta seedha farz karoon kuchh seedha ulta ho jaa.e main aah likhoon tu haay kare bechain likhoon bechain ho tu phir bechain ka be kaatoon tujhe chain zaraa sa ho jaa.e abhii ain likhoon tu soche mujhe phir sheen likhoon teri neend ude jab qaaf likhoon tujhe kuchh kuchh ho main ishq likhoon tujhe ho jaa.e

ham milenge kahii ham milenge kahii ajnabi shahar ki KHvaab hoti hui shaahraaoon pe aur shaahraaoon pe phaili hui dhoop men ek din ham kahii saath hoge vaqt ki aandhiyon se ati saahtoon par se miTTi hataate huye ek hi jaise aañsu behaate huye ham milenge ghane janglo ki hari ghaas par aur kisi shaakh-e-naazuk par padte huye bojh ki dastaanon men kho jaayenge ham sanobar ke pedon ki nokiile patton se sadiyon se soye huye devataaon ki aañkhen chabo jaayenge ham milenge kahii barf ke bajuon men ghire parvaton par baanjh qabro men lete huye koh pemaaon ki yaad men nazm kahte huye jo pahaadoon ki aulaad thein aur unhen vaqt aane par maa baap ne apni aaghosh men le liya ham milenge kahii shah sulemaan ke urs men hauz ki seediyon par wuzu karne waalo ke shaffaaf chehron ke aage sangemarmar se aarasta farsh par pair rakhte huye aah bharte huye aur darakhton ko mannat ke dhaago se azaad karte huye ham milenge ham milenge kahii naarmendi ke saahil pe aate huye apne gum gashtarashto ki khaak-e-safar se ati vardiyo ke nishaan dekh kar maraakis se palte huye ek jarnel ki aakhiri baat par muskuraate huye ik jahaan jang ki chot khaate huye ham milenge ham milenge kahii roos ki daastaon ki jhoothi kahaanii pe aankhoñ men hairat sajaaye huye shaam lebnaan beirut ki nargisi chashmuro ki aamad ke nohoo pe hanste huye khooni kaziyo se maflooh jalbaaniyaan ke pahaadi ilaaqon men mehmaan ban kar milenge ham milenge ek murda zamaane ki KHush rang tahzeeb men zasb hone ke imkaan men ik puraani imarat ke pahluu men ujde huye laan men aur apne asiroon ki raah dekhte paanch sadiyon se veeraan zindaan men ham milenge tamannaon ki chhatriyon ke tale khwahishon ki hawaon ke bebaak boso se chhalni badan saumpane ke liye raaston ko ham milenge zameen se namoodaar hote huye aathvein barre azam men udte huye kaaleen par ham milenge kisi baar men apni bakaaya bachi umr ki paaymaali ke jaam haath men lenge aur ek hi ghoont men ham ye saiyal andar utaarenge aur hosh aane talak geet gaayenge bachpan ke qisse sunaata hua geet jo aaj bhi hamko azbar hai bedi be bedi tu thildi tapaiye pate paar kya hai pate paar kya hai ham milenge baagh men gaav men dhoop men chaanv men ret men dasht men shahar men masjidoon men kaliso men mandir men mehraab men church men mooslaadhaar baarish men bazaar men KHvaab men aag men gehre paani men galiyon men jungle men aur aasmaanon men kono makaan se pare gair aabda saiyaraaye aarzoo men sadiyon se khaali padi bench par jahaan maut bhi ham se dasto garebaan hogii to bas ek do din ki mehmaan hogii

ramz tum jab aaogi to khoya hua paayogi mujhe meri tanhaaii men KHvaabon ke siva kuchh bhi nahin mere kamre ko sajaane ki tamannaa hai tumhein mere kamre men kitaabon ke siva kuchh bhi nahin in kitaabon ne badaa zulm kiya hai mujh par in men ik ramz hai jis ramz ka maara hua zehan muzdaa-e-ishrat-e-anjaam nahin pa saka zindagi men kabhi aaraam nahin pa saka

"Hamesha der kar deta hooñ" hamesha der kar deta hooñ main har kaam karne men zaroori baat kahni ho koi vaa'da nibhaana ho use awaaz deni ho use waapas bulaana ho hamesha der kar deta hooñ main madad karne ho us ki yaar ki dhaaras bandhaana ho bahut deerina raston par kisi se milne jaana ho hamesha der kar deta hooñ main badalte mausamon ki sair men dil ko lagana ho kisi ko yaad rakhna ho kisi ko bhool jaana ho hamesha der kar deta hooñ main kisi ko maut se pahle kisi gham se bachaana ho haqeeqat aur thii kuchh us ko ja ke ye bataana ho hamesha der kar deta hooñ main har kaam karne men

tu kisi aur hi duniya men mili thii mujhse tu kisi aur hi mausam ki mahak laai thii dar raha tha ki kahii zakham na bhar jaayen mere aur tu mutthiyaan bhar-bhar ke namak laai thii aur hi tarah ki aañkhen thii tere chehre par tu kisi aur sitaare se chamak laai thii teri awaaz hi sabkuchh thii mujhe monis-e-jaan kya karun main ki tu boli hi bahut kam mujhse teri chup se hi yahii mehsoos kiya tha maine jeet jayega teraa gham kisi roz mujhse shahar aawaazen lagata tha magar tu chup thii ye taalluq mujhe khaata tha magar tu chup thii vahii anjaam tha jo ishq ka aagaaz se hai tujhko paaya bhi nahin tha ki tujhe khona tha chali aati hai yahii rasm kaii sadiyon se yahii hota hai yahii hogaa yahii hona tha poochta rehta tha tujhse ki bataa kya dukh hai aur meri aankh men aañsu bhi nahin hote the maine andaaze lagaye ke sabab kya hogaa par mere teer taraazu bhi nahin hote the jiska dar tha mujhe maaloom pada logon se phir vo khush-bakht palat aaya teri duniya men jiske jaane pe mujhe tune jagah dii dil men meri qismat men hi jab khaali jagah likhi thii tujhse shikwa bhi agar karta to kaise karta main vo sabza tha jise raund diya jaata hai main vo jungle tha jise kaat diya jaata hai main vo dard tha jise dastak ki kamii khaati hai main vo manzil tha jahaan tooti sadak jaati hai main vo ghar tha jise aabaad nahin karta koi main to vo tha jise yaad nahin karta koi KHair is baat ko tu chhod bataa kaisi hai tune chaaha tha jise vo tere nazdeek to hai kaun se gham ne tujhe chaat liya andar se aaj kal phir se tu chup rahtii hai sab theek to hai

zinda-baash ai inqilaab ai shola-e-faanus-e-hind garmiyaan jis ki farogh-e-mankul-e-jaan ho gaiin bastiyon par chha rahi theen maut ki khaamoshiyaan tu ne soor apna jo phoonka mahsharistan. ho gaiin jitni boonden theen shaheedaan-e-watan ke KHoon ki qasr-aazaa dii ki aaraish ka saamaan ho gaiin marhaba ai nau-giraftaar-e-bedad-e-farang jin ki zanjeeren kharosh-afza-e-zindaan ho gaiin zindagi un ki hai deen un ka hai duniya un ki hai jin ki jaanen qaum ki izzat pe qurbaan ho gaiin

naaqoos se garz hai na matlab azaan se hai mujh ko agar hai ishq to hindostaan se hai tahzeeb-e-hind ka nahin chashma agar azal ye mauj-e-rang-rang phir aayi kahaan se hai zarre men gar tadap hai to is arz-e-paak se suraj men raushni hai to is aasmaañ se hai hai is ke dam se garmi-e-hangaama-e-jahaan maghrib ki saari raunaq isee ik dukaaan se hai

ai nukta-varaan-e-sukhan-aara-o-sukhan-sanj ai naghma-giraan-e-chamanistaan-e-maafi maana ki dil-afroz hai afsaana-e-azra maana ki dil-aawez hai salma ki kahaanii maana ki agar chhed haseenon se chali jaa.e kat jaayega is mashghale men ahad-e-jawaani garmaayega ye hamhama afsurda dilon ko badh jaayegi dariya-e-tabeeat ki ravaani maana ki hain aap apne zamaane ke nazeeri maana ki har ik aap men hai urfi-e-saani maana ki hadees-e-khat-o-rukhsaar ke aage bekar hai mashshaaiyon ki falsafa-daani maana ki yahii zulf o khat-o-khaal ki roodaad hai maaya-e-gul-kaari-e-aivaan-e-maafi lekin kabhi is baat ko bhi aap ne socha ye aap ki taqweem hai sadiyon ki puraani maashooq naye bazm nayi rang naya hai paida naye khaa men hue hain aur naye maani mizgaan ki sinaan ke evaz ab sunti hai mehfil kaanton ki kathaa barhana-paai ki zabaani lazzat vo kahaan laal-e-lab-e-yaar men hai aaj jo de rahi hai pet ke bhookhon ki kahaanii badla hai zamaana to badliye ravish apni jo qaum hai bedaar ye hai us ki nishaani ai hum-nafso yaad rahe khoob ye tum ko bastii nayi mashriq men humeen ko hai basaani

ashnaan karne ghar se chale laala-laal-chand aur aage aage lala ke un ki bahu gaii poocha jo main ne lala lallaain kahaan gaiin neechi nazar se kehne lage vo bhi choo gaii main ne diya javaab unhen az-rah-e-mazaq kya vo bhi koi chat thii ki baarish se choo gaii kehne lage ki aap bhi hain maskhare ajab ab tak bhi aap se na tamaskhur ki khoo gaii choo hoshiyaar par main na dii se hai ye muraad bibi tameez bhi hain wahin karne wuzoo gaii main ne kaha ki choo se agar hai muraad joo phir yuñ kaho ki ta-b-lab-e-aab-joo gaii kyun ainthen hain maash ke aate ki tarah aap dhoti se aap ki nahin hal dii ki boo gaii lutfe-zabaan se kya ho sarokaar aap ko daaman ko aap ke nahin tahzeeb choo gaii hin dii ne aa ke jeem kooche se badal diya choo aayi kohsaar se gulshan se joo gaii lahjaa hua durusht zabaan ho gaii karkht lutf-e-kalam-o-shistagi-e-guftugu gaii maani ko hai gilaa ki hua be-hijaab main shikwa hai lafz ko ki mirii aabroo gaii afsos mulk men na rahi faarsi ki qadr masti udri sharaab se phoolon ki boo gaii

baarha dekha hai tu ne aasmaañ ka inqilaab khol aankh aur dekh ab hindostaan ka inqilaab maghrib o mashriq nazar aane lage zer-o-zabar inqilaab-e-hind hai saare jahaan ka inqilaab kar raha hai qasr-aazaa dii ki buniyaad ustuvaar fitrat-e-tifl-o-zan-o-peer-o-jawan ka inqilaab sabr waale chha rahe hain jabr ki aqliim par ho gaya farsooda shamsher-o-sinaan ka inqilaab