kisne dastak dii ye dil par kaun hai aap to andar hain baahar kaun hai

ik hunar hai jo kar gaya hooñ main sab ke dil se utar gaya hooñ main

isi li.e to sabse zyaada bhaati ho kitne sacche dil se jhoothi qasmen khaati ho

dil se saabit karo ki zinda ho saans lena koi suboot nahin

bichhad ga.e to ye dil umr bhar lagega nahin lagega lagne laga hai magar lagega nahin nahin lagega use dekh kar magar KHush hai main KHush nahin hooñ magar dekh kar lagega nahin

ye KHaamushi ka zahar nason men utar na jaa.e awaaz kii shikast gawara na kar abhii

ye kya tilism hai kyun raat bhar siskata hooñ vo kaun hai jo diyon men jala raha hai mujhe

mujh men saath samundar shor machaate hain ek khayal ne dahshat faila rakkhi hai

mujh ko mirii shikast kii dohri saza mili tujh se bichhad ke zindagi duniya se ja mili

muddat hui ik shaKHs ne dil tod diya tha is vaaste apnon se mohabbat nahin karte