Top 20 Sher by Irfan Siddiqi

utho ye manzar-e-shab-tab dekhne ke liye ki nind shart nahin khwab dekhne ke liye

badan mein jaise lahu taziyana ho gaya hai use gale se lagae zamana ho gaya hai

tum parindon se ziyaada to nahin ho aazad sham hone ko hai ab ghar ki taraf laut chalo

raat ko jit to pata nahin lekin ye charagh kam se kam raat ka nuqsan bahut karta hai

hoshiyari dil-e-nadan bahut karta hai ranj kam sahta hai elan bahut karta hai

badan ke donon kinaron se jal raha hun main ki chhu raha hun tujhe aur pighal raha hun main

sar agar sar hai to nezon se shikayat kaisi dil agar dil hai to dariya se bada hona hai

jo kuchh hua wo kaise hua jaanta hun main jo kuchh nahin hua wo bata kyun nahin hua

ret par thak ke gira hun to hawa puchhti hai aap is dasht mein kyun aae the wahshat ke baghair

hamein to khair bikharna hi tha kabhi na kabhi hawa-e-taza ka jhonka bahana ho gaya hai

ajab harif tha mere hi sath dub gaya mere safine ko gharqab dekhne ke liye

sarhaden achchhi ki sarhad pe na rukna achchha sochiye aadmi achchha ki parinda achchha

apne kis kaam mein laega batata bhi nahin hum ko auron pe ganwana bhi nahin chahta hai

main chahta hun yahin sare faisle ho jaen ki is ke ba'd ye duniya kahan se launga main

hum ne dekha hi tha duniya ko abhi us ke baghair lijiye bich mein phir dida-e-tar aa gae hain

ruh ko ruh se milne nahin deta hai badan khair ye bich ki diwar gira chahti hai

kaha tha tum ne ki lata hai kaun ishq ki tab so hum jawab tumhaare sawal hi ke to hain

shoala-e-ishq bujhana bhi nahin chahta hai wo magar khud ko jalana bhi nahin chahta hai

hamare dil ko ek aazar hai aisa nahin lagta ki hum daftar bhi jate hain ghazal-khwani bhi karte hain

magar giraft mein aata nahin badan us ka khayal dhundhta rahta hai istiara koi