Top 20 Sher by Mubarak Azimabadi

teri bakhshish ke bharose pe khataen ki hain teri rahmat ke sahaare ne gunahgar kiya

jo nigah-e-naz ka bismil nahin dil nahin wo dil nahin wo dil nahin

mujh ko malum hai anjam-e-mohabbat kya hai ek din maut ki ummid pe jina hoga

phul kya daloge turbat par meri khak bhi tum se na dali jaegi

rahne de apni bandagi zahid be-mohabbat khuda nahin milta

din bhi hai raat bhi hai subh bhi hai sham bhi hai itne waqton mein koi waqt-e-mulaqat bhi hai

teri ada ki qasam hai teri ada ke siwa pasand aur kisi ki hamein ada na hui

kab wo aaenge ilahi mere mehman ho kar kaun din kaun baras kaun mahina hoga

jo dil-nashin ho kisi ke to is ka kya kahna jagah nasib se milti hai dil ke goshon mein

aap ka ikhtiyar hai sab par aap par ikhtiyar kis ka hai

apni si karo tum bhi apni si karen hum bhi kuchh tum ne bhi thani hai kuchh hum ne bhi thani hai

mehrbani chaarasazon ki badhi jab badha darman to bimari badhi

le chala phir mujhe dil yar-e-dil-azar ke pas ab ke chhod aaunga zalim ko sitamgar ke pas

ek teri baat ki jis baat ki tardid muhaal ek mera khwab ki jis khwab ki tabir nahin

samjhaen kis tarah dil-e-na-karda-kar ko ye dosti samajhta hai dushman ke pyar ko

kisi ne barchhiyan marin kisi ne tir mare hain khuda rakkhe inhen ye sab karam-farma hamare hain

ye gham-kada hai is mein 'mubarak' khushi kahan gham ko khushi bana koi pahlu nikal ke

mohabbat mein wafa ki had jafa ki intiha kaisi 'mubarak' phir na kahna ye sitam koi sahe kab tak

shikast-e-tauba ki tamhid hai teri tauba zaban pe tauba 'mubarak' nigah saghar par

khair saqi ki salamat mai-kada jis qadar pi utni hushyari badhi