Top 20 Sher by Muneer Shikohabadi

aankhen khuda ne bakhshi hain rone ke waste do kashtiyan mili hain dubone ke waste

surkhi shafaq ki zard ho galon ke samne pani bhare ghata tere baalon ke samne

jati hai dur baat nikal kar zaban se phirta nahin wo tir jo nikla kaman se

bosa honton ka mil gaya kis ko dil mein kuchh aaj dard mitha hai

ehsan nahin khwab mein aae jo mere pas chori ki mulaqat mulaqat nahin hai

dekha hai aashiqon ne barahman ki aankh se har but khuda hai chahne walon ke samne

bose hain be-hisab har din ke wade kyun talte ho gin gin ke

kabhi payam na bheja buton ne mere pas khuda hain kaise ki paighambar nahin rakhte

zahido puja tumhaari khub hogi hashr mein but bana degi tumhein ye haq-parasti ek din

ai but ye hai namaz ki hai ghat qatl ki niyyat ada ki hai ki ishaare qaza ke hain

garmi-e-husn ki midhat ka sila lete hain mishalen aap ke sae se jala lete hain

chehra tamam surkh hai mahram ke rang se angiya ka pan dekh ke munh lal ho gaya

us but ke nahane se hua saf ye pani moti bhi sadaf mein tah-e-dariya nazar aaya

aankhon mein nahin silsila-e-ashk shab-o-roz tasbih padha karte hain din raat tumhaari

main justuju se kufr mein pahuncha khuda ke pas kabe tak in buton ka mujhe nam le gaya

shabnam ki hai angiya tale angiya ki pasina kya lutf hai shabnam tah-e-shabnam nazar aai

shaikh le hai rah kabe ki barahman dair ki ishq ka rasta juda hai kufr aur islam se

shukr hai jama se bahar wo hua ghusse mein jo ki parde mein bhi uryan na hua tha so hua

jaan kar us but ka ghar kaba ko sajda kar liya ai barahman mujh ko baitullah ne dhoka diya

bhatke phire do amla-e-dair-o-haram mein hum is samt kufr us taraf islam le gaya