Top 20 Sher by Shakeel Badayuni

ai mohabbat tere anjam pe rona aaya jaane kyun aaj tere nam pe rona aaya love your sad conclusion makes me weep wonder why your mention makes me weep

kabhi yak-ba-yak tawajjoh kabhi dafatan taghaful mujhe aazma raha hai koi rukh badal badal kar

mere ham-nafas mere ham-nawa mujhe dost ban ke dagha na de main hun dard-e-ishq se jaan-ba-lab mujhe zindagi ki dua na de my companion, my intimate, be not a friend and yet betray the pain of love is fatal now, for my life please do not pray

un ka zikr un ki tamanna un ki yaad waqt kitna qimti hai aaj kal her mention, her yearning her memory o how precious time now seems to me

kaise kah dun ki mulaqat nahin hoti hai roz milte hain magar baat nahin hoti hai

mujhe chhod de mere haal par tera kya bharosa hai chaaragar ye teri nawazish-e-mukhtasar mera dard aur badha na de leave me to my present state, i do not trust your medicine your mercy minor though may be,might increase my pain today

mujhe dost kahne wale zara dosti nibha de ye mutalba hai haq ka koi iltija nahin hai

mera azm itna buland hai ki parae sholon ka dar nahin mujhe khauf aatish-e-gul se hai ye kahin chaman ko jala na de my confidence in self is strong, i'm unafraid of foreign flames i'm scared those sparks may ignite, that in the blossom's bosom lay

ye ada-e-be-niyazi tujhe bewafa mubarak magar aisi be-rukhi kya ki salam tak na pahunche

mohabbat hi mein milte hain shikayat ke maze paiham mohabbat jitni badhti hai shikayat hoti jati hai

unhen apne dil ki khabren mere dil se mil rahi hain main jo un se ruth jaun to payam tak na pahunche

tark-e-mai hi samajh ise naseh itni pi hai ki pi nahin jati

nai subh par nazar hai magar aah ye bhi dar hai ye sahar bhi rafta rafta kahin sham tak na pahunche

main nazar se pi raha tha to ye dil ne bad-dua di tera hath zindagi bhar kabhi jam tak na pahunche

dil ki barbaadiyon pe nazan hun fath pa kar shikast khai hai

dil ki taraf 'shakil' tawajjoh zarur ho ye ghar ujad gaya to basaya na jaega

utha jo mina-ba-dast saqi rahi na kuchh tab-e-zabt baqi tamam mai-kash pukar utthe yahan se pahle yahan se pahle

wo hawa de rahe hain daman ki hae kis waqt nind aai hai

na paimane khanakte hain na daur-e-jam chalta hai nai duniya ke rindon mein khuda ka nam chalta hai

gham-e-hayat bhi aaghosh-e-husn-e-yar mein hai ye wo khizan hai jo dubi hui bahaar mein hai