Top 20 Sher by Wazir Ali Saba Lakhnavi

aap hi apne zara jaur-o-sitam ko dekhen hum agar arz karenge to shikayat hogi

dil mein ek dard utha aankhon mein aansu bhar aae baithe baithe hamein kya jaaniye kya yaad aaya

baqi rahe na farq zamin aasman mein apna qadam utha len agar darmiyan se hum

baat bhi aap ke aage na zaban se nikli lijiye aae the hum soch ke kya kya dil mein

kahte hain mere dost mera haal dekh kar dushman ko bhi khuda na kare mubtala-e-ishq

na karen aap wafa hum ko kya bewafa aap hi kahlaiyega

aadam se bagh-e-khuld chhuta hum se ku-e-yar wo ibtida-e-ranj hai ye intiha-e-ranj

teri talash mein mah ki tarah main phirta hun kahan tu raat ko ai aaftab rahta hai

qaid-e-mazhab waqai ek rog hai aadmi ko chahiye aazad ho

mere baghal mein rah ke mujhi ko kiya zalil nafrat si ho gai dil-e-khana-kharab se

kaleja kanpta hai dekh kar is sard-mehri ko tumhaare ghar mein kya aae ki hum kashmir mein aae

itni to did-e-ishq ki tasir dekhiye jis samt dekhiye teri taswir dekhiye

kaba banaiye ki kalisa banaiye dil sa makan hawale kiya hai janab ke

hua dhup mein bhi na kam husn-e-yar kanhayya bana wo jo sanwla gaya

roz o shab furqat-e-jaanan mein basar ki hum ne tujh se kuchh kaam na ai gardish-e-dauran nikla

sakin-e-dair hun ek but ka hun banda ba-khuda khud wo kafir hain jo kahte hain musalman mujh ko

kabe ki samt sajda kiya dil ko chhod kar to kis taraf tha dhyan hamara kidhar gaya

tumhaari zulf na girdab-e-naf tak pahunchi hui na chashma-e-haiwan se faiz-yab ghata

ulfat-e-kucha-e-jaanan ne kiya khana-kharab barhaman dair se kabe se musalman nikla

khud-raftagi hai chashm-e-haqiqat jo wa hui darwaza khul gaya to main ghar se nikal gaya