Top 20 Sher by Zeb Ghauri

zakhm laga kar us ka bhi kuchh hath khula main bhi dhoka kha kar kuchh chaalak hua

bade azab mein hun mujh ko jaan bhi hai aziz sitam ko dekh ke chup bhi raha nahin jata

dil hai ki teri yaad se khali nahin rahta shayad hi kabhi main ne tujhe yaad kiya ho

meri jagah koi aaina rakh liya hota na jaane tere tamashe mein mera kaam hai kya

dil ko sambhaale hansta bolta rahta hun lekin sach puchho to 'zeb' tabiat thik nahin hoti

adhuri chhod ke taswir mar gaya wo 'zeb' koi bhi rang mayassar na tha lahu ke siwa

ghasitte hue khud ko phiroge 'zeb' kahan chalo ki khak ko de aaen ye badan us ka

jag ke mere sath samundar raaten karta hai jab sab log chale jaen to baaten karta hai

ye kam hai kya ki mere pas baitha rahta hai wo jab talak mere dil ko dukha nahin jata

talash ek bahana tha khak udane ka pata chala ki hamein justuju-e-yar na thi

main lakh ise taza rakhun dil ke lahu se lekin teri taswir khayali hi rahegi

kuchh dur tak to chamki thi mere lahu ki dhaar phir raat apne sath baha le gai mujhe

ek kiran bas raushniyon mein sharik nahin hoti dil ke bujhne se duniya tarik nahin hoti

main to chaak pe kuza-gar ke hath ki mitti hun ab ye mitti dekh khilauna kaise banti hai

ye dubti hui kya shai hai teri aankhon mein tere labon pe jo raushan hai us ka nam hai kya

khuli chhaton se chandni raaten katra jaengi kuchh hum bhi tanhai ke aadi ho jaenge

ulat rahi thin hawaen waraq waraq us ka likhi gai thi jo mitti pe wo kitab tha wo

na jaane kya hai ki jab bhi main us ko dekhta hun to koi aur mere ru-ba-ru nikalta hai

dho ke tu mera lahu apne hunar ko na chhupa ki ye surkhi teri shamshir ka jauhar hi to hai

ek jhonka hawa ka aaya 'zeb' aur phir main ghubar bhi na raha

dekh kabhi aa kar ye la-mahdud faza tu bhi meri tanhai mein shamil ho