aKHbaar

khincho na kamanon ko na talwar nikalo jab top muqabil ho to akhbar nikalo neither bow and arrow nor a sword do you require pubish a newspaper when faced with cannon fire

hamare shahr ke logon ka ab ahwal itna hai kabhi akhbar padh lena kabhi akhbar ho jaana

is waqt wahan kaun dhuan dekhne jae akhbar mein padh lenge kahan aag lagi thi

jo dil ko hai khabar kahin milti nahin khabar har subh ek azab hai akhbar dekhna

zara si chae giri aur dagh dagh waraq ye zindagi hai ki akhbar ka tarasha hai

das baje raat ko so jate hain khabren sun kar aankh khulti hai to akhbar talab karte hain

raat ke lamhat khuni dastan likhte rahe subh ke akhbar mein haalat behtar ho gae

surkhiyan khun mein dubi hain sab akhbaron ki aaj ke din koi akhbar na dekha jae

kaun padhta hai yahan khol ke ab dil ki kitab ab to chehre ko hi akhbar kiya jaana hai

mujh ko akhbar si lagti hain tumhaari baaten har nae roz naya fitna bayan karti hain

gumnam ek lash kafan ko taras gai kaghaz tamam shahr ke akhbar ban gae

aise mar jaen koi naqsh na chhoden apna yaad dil mein na ho akhbar mein taswir na ho

bam phate log mare khun baha shahr lute aur kya likkha hai akhbar mein aage padhiye

koi nahin jo pata de dilon ki haalat ka ki sare shahr ke akhbar hain khabar ke baghair

wo khush-nasib the jinhen apni khabar na thi yan jab bhi aankh kholiye akhbar dekhiye

koi column nahin hai hadson par bacha kar aaj ka akhbar rakhna

surkhiyan akhbar ki galiyon mein ghul karti rahin log apne band kamron mein pade sote rahe

dekho to har baghal mein hai daftar daba hua akhbar mein jo chhapna chaho khabar nahin

main surkhiyon mein kahan se hota main hashiye ki khabar raha hun

mujhe bhi padh liya hota sabhi ne mera lahja agar akhbar hota