Top 20 Sher by Adil Mansuri

mere tute hausle ke par nikalte dekh kar us ne diwaron ko apni aur uncha kar diya

kis tarah jama kijiye ab apne aap ko kaghaz bikhar rahe hain purani kitab ke

wo kaun tha jo din ke ujale mein kho gaya ye chand kis ko dhundne nikla hai sham se

koi khud-kushi ki taraf chal diya udasi ki mehnat thikane lagi

jo chup-chap rahti thi diwar par wo taswir baaten banane lagi

jita hai sirf tere liye kaun mar ke dekh ek roz meri jaan ye harkat bhi kar ke dekh

mujhe pasand nahin aise karobar mein hun ye jabr hai ki main khud apne ikhtiyar mein hun

dariya ke kinare pe meri lash padi thi aur pani ki tah mein wo mujhe dhund raha tha

kab tak pade rahoge hawaon ke hath mein kab tak chalega khokhle shabdon ka karobar

nind bhi jagti rahi pure hue na khwab bhi subh hui zamin par raat dhali mazar mein

soe to dil mein ek jahan jagne laga jage to apni aankh mein jale the khwab ke

kabhi khak walon ki baaten bhi sun kabhi aasmanon se niche utar

allah jaane kis pe akadta tha raat din kuchh bhi nahin tha phir bhi bada bad-zaban tha

hammam ke aaine mein shab dub rahi thi cigarette se nae din ka dhuan phail raha tha

kab se tahal rahe hain gareban khol kar khali ghata ko kya karen barsat bhi to ho

bismil ke tadapne ki adaon mein nasha tha main hath mein talwar liye jhum raha tha

har aankh mein thi tutte lamhon ki tishnagi har jism pe tha waqt ka saya pada hua

jaane kis ko dhundne dakhil hua hai jism mein haddiyon mein rasta karta hua pila bukhar

na koi rok saka khwab ke safiron ko udas kar gae nindon ke rahgiron ko

lahu mein utarti rahi chandni badan raat ka kitna thanda laga

phir koi wusat-e-afaq pe saya dale phir kisi aankh ke nuqte mein utara jaun