Top 20 Sher by Imdad Ali Bahr

aankhen na jine dengi teri be-wafa mujhe kyun khidkiyon se jhank rahi hai qaza mujhe

hum na kahte the hansi achchhi nahin aa gai aakhir rukawat dekhiye

banawat waza-dari mein ho ya be-sakhta-pan mein hamein andaz wo bhata hai jis mein kuchh ada nikle

khwahish-e-didar mein aankhen bhi hain meri raqib sat pardon mein chhupa rakkha hai us ke nur ko

mujh ko rone to do dikha dunga bulbula hai ye aasman nahin

kausar ka jam us ko ilahi nasib ho koi sharab meri lahad par chhidak gaya

juta naya pahan ke wo panjon ke bal chale kapde badal ke jame se bahar nikal chale

kafir-e-ishq hun main sab se mohabbat hai mujhe ek but kya ki samaya hai kalisa dil mein

zahid sunaun wasf jo apni sharab ke padhne lagen darud farishte sawab ke

kisi ne kaba banaya kisi ne but-khana bana na ek gharaunda tumhaare ghar ki tarah

diwangi mein phenk rahe the jo hum libas utri qaba bukhar badan se utar gaya

duniya mein 'bahr' kaun ibaadat-guzar hai saum-o-salat dakhil-e-rasm-o-riwaj hai

mera dil kis ne liya nam bataun kis ka main hun ya aap hain ghar mein koi aaya na gaya

bhatak ke koi gaya dair ko koi kabe ajib bhul-bhulayyan hai marhala dil ka

abr-e-bahaar ab bhi jachta nahin nazar mein kuchh aansuon ke qatre ab bhi hain chashm-e-tar mein

be-tarah dil mein bhara rahta hai zulfon ka dhuan dam nikal jae kisi roz na ghut kar apna

ungliyan tu ne jo ai rashk-e-chaman chatkain mujh ko ghunchon ke chatakne ki sadaen aain

ratb-o-yabis mein hai tasarruf-e-ishq aankh dariya hai dil jazira hai

talash-e-yar mein gardish ko main tauf-e-haram samjhun karun chaaron-taraf sajde ki wo har-su nikalte hain

muddat se iltifat mere haal par nahin kuchh to kaji hai dil mein ki sidhi nazar nahin