Top 20 Sher by Obaidullah Aleem

aziz itna hi rakkho ki ji sambhal jae ab is qadar bhi na chaho ki dam nikal jae

hawa ke dosh pe rakkhe hue charagh hain hum jo bujh gae to hawa se shikayaten kaisi

ab to mil jao hamein tum ki tumhaari khatir itni dur aa gae duniya se kinara karte

ek chehre mein to mumkin nahin itne chehre kis se karte jo koi ishq dobara karte

kash dekho kabhi tute hue aainon ko dil shikasta ho to phir apna paraya kya hai

jawani kya hui ek raat ki kahani hui badan purana hua ruh bhi purani hui

hazar tarah ke sadme uthane wale log na jaane kya hua ek aan mein bikhar se gae

hae wo log gae chand se milne aur phir apne hi tute hue khwab utha kar le aae

zamin ke log to kya do dilon ki chahat mein khuda bhi ho to use darmiyan lao mat

raushni aadhi idhar aadhi udhar ek diya rakkha hai diwaron ke bich

ye kaisi bichhadne ki saza hai aaine mein chehra rakh gaya hai

main us ko bhul gaya hun wo mujh ko bhul gaya to phir ye dil pe kyun dastak si na-gahani hui

main ek se kisi mausam mein rah nahin sakta kabhi visal kabhi hijr se rihai de

agar hon kachche gharondon mein aadmi aabaad to ek abr bhi sailab ke barabar hai

tum apne rang nahao main apni mauj udun wo baat bhul bhi jao jo aani-jaani hui

shikasta-haal sa be-asra sa lagta hai ye shahr dil se ziyaada dukha sa lagta hai

jo aa rahi hai sada ghaur se suno us ko ki is sada mein khuda bolta sa lagta hai

mujh se mera koi milne wala bichhda to nahin magar mila de

dosto jashn manao ki bahaar aai hai phul girte hain har ek shakh se aansu ki tarah

kha gaya insan ko aashob-e-maash aa gae hain shahr bazaron ke bich