Top 20 Sher by Sarvat Husain

maut ke darinde mein ek kashish to hai 'sarwat' log kuchh bhi kahte hon khud-kushi ke bare mein

bhar jaenge jab zakhm to aaunga dobara main haar gaya jang magar dil nahin haara

mitti pe numudar hain pani ke zakhire in mein koi aurat se ziyaada nahin gahra

milna aur bichhad jaana kisi raste par ek yahi qissa aadamiyon ke sath raha

sochta hun ki us se bach niklun bach nikalne ke ba'd kya hoga

do hi chizen is dharti mein dekhne wali hain mitti ki sundarta dekho aur mujhe dekho

'sarwat' tum apne logon se yun milte ho jaise un logon se milna phir nahin hoga

khush-libasi hai badi chiz magar kya kije kaam is pal hai tere jism ki uryani se

bujhi ruh ki pyas lekin sakhi mere sath mera badan bhi to hai

shahzadi tujhe kaun batae tere charag-kade tak kitni mehraben padti hain kitne dar aate hain

main aag dekhta tha aag se juda kar ke bala ka rang tha rangini-e-qaba se udhar

ek dastan ab bhi sunate hain farsh o baam wo kaun thi jo raqs ke aalam mein mar gai

main kitab-e-khak kholun to khule kya nahin maujud kya maujud hai

mere sine mein dil hai ya koi shahzada-e-khud-sar kisi din us ko taj-o-takht se mahrum kar dekhun

wo ek suraj subh talak mere pahlu mein apni sab naraazgiyon ke sath raha

kabhi tegh-e-tez supurd ki kabhi tohfa-e-gul-e-tar diya kisi shah-zadi ke ishq ne mera dil sitaron se bhar diya

main apni pyas ke hamrah mashkiza uthae ki in sairab logon mein koi pyasa milega

bahut musir the khudayan-e-sabit-o-sayyar so main ne aaina o aasman pasand kiye

saya-e-abr se puchho 'sarwat' apne hamrah agar le jae

siyahi pherti jati hain raaten bahr o bar pe inhi tarikiyon se mujh ko bhi hissa milega