Holi

gulabi gal par kuchh rang mujh ko bhi jamane do manane do mujhe bhi jaan-e-man tyauhaar holi mein

tere galon pe jab gulal laga ye jahan mujh ko lal lal laga

munh par naqab-e-zard har ek zulf par gulal holi ki sham hi to sahar hai basant ki

sajni ki aankhon mein chhup kar jab jhanka bin holi khele hi sajan bhig gaya

mausam-e-holi hai din aae hain rang aur rag ke hum se tum kuchh mangne aao bahane phag ke

saqi kuchh aaj tujh ko khabar hai basant ki har su bahaar pesh-e-nazar hai basant ki

ghair se kheli hai holi yar ne dale mujh par dida-e-khun-bar rang

kab tak chunari par hi zulm hon rangon ke rangreza teri bhi qaba par barse rang

mujh ko ehsas-e-rang-o-bu na hua yun bhi aksar bahaar aai hai

ab ki holi mein raha be-kar rang aur hi laya firaq-e-yar rang

bahaar aai ki din holi ke aae gulon mein rang khela ja raha hai

pura karenge holi mein kya wada-e-visal jin ko abhi basant ki ai dil khabar nahin

wo tamasha o khel holi ka sab ke tan rakht-e-kesari hai yaad

wo aae to rang sanwarne lagte hain jaise bichhda yar bhi koi mausam hai

sans leta hua har rang nazar aaega tum kisi roz mere rang mein aao to sahi

holi ke ab bahane chhidka hai rang kis ne nam-e-khuda tujh upar is aan ajab saman hai

wo rang rang ke chhinte pade ki us ke baad kabhi na phir nae kapde pahan ke nikla main

dal kar ghunchon ki mundri shakh-e-gul ke kan mein ab ke holi mein banana gul ko jogan ai saba

baadal aae hain ghir gulal ke lal kuchh kisi ka nahin kisi ko khayal

kis ki holi jashn-e-nau-rozi hai aaj surkh mai se saqiya dastar rang

main dur tha to apne hi chehre pe mal liya is zindagi ke hath mein jitna gulal tha

saikdon rangon ki barish ho chukegi us ke baad itr mein bhigi hui shamon ka manzar aaega

muhayya sab hai ab asbab-e-holi utho yaro bharo rangon se jholi

tu bhi dekhega zara rang utar len tere hum hi rakhte hain tujhe yaad ki sab rakhte hain

bahut hi khushki mein guzri hai is baras holi gila hai tujh se ki gila nahin kiya mujh ko

shab jo holi ki hai milne ko tere mukhde se jaan chand aur tare liye phirte hain afshan hath mein

wo kudte uchhalte rangin pairahan the masum qahqahon mein udta gulal dekha

main ne kuchh rang uchhaale the hawaon mein 'nabil' aur taswir teri dhyan se bahar aai

kitni ranginiyon mein teri yaad kis qadar sadgi se aati hai

sab ka alag andaz tha sab rang rakhte the juda rahna sabhi ke sath tha so khud ko pani kar liya