Bahaar

main ne dekha hai bahaaron mein chaman ko jalte hai koi khwab ki tabir batane wala

ai dil-e-be-qarar chup ho ja ja chuki hai bahaar chup ho ja

bahaaron ki nazar mein phul aur kante barabar hain mohabbat kya karenge dost dushman dekhne wale

bahaar aae to mera salam kah dena mujhe to aaj talab kar liya hai sahra ne

meri zindagi pe na muskura mujhe zindagi ka alam nahin jise tere gham se ho wasta wo khizan bahaar se kam nahin

meri aankhon mein hain aansu tere daman mein bahaar gul bana sakta hai tu shabnam bana sakta hun main

afsurdagi bhi husn hai tabindagi bhi husn hum ko khizan ne tum ko sanwara bahaar ne

shaguftagi-e-dil-e-karwan ko kya samjhe wo ek nigah jo uljhi hui bahaar mein hai

tuk dekh len chaman ko chalo lala-zar tak kya jaane phir jien na jien hum bahaar tak

us ko khizan ke aane ka kya ranj kya qalaq rote kata ho jis ko zamana bahaar ka

na sair-e-bagh na milna na mithi baaten hain ye din bahaar ke ai jaan muft jate hain

lutf-e-bahaar kuchh nahin go hai wahi bahaar dil hi ujad gaya ki zamana ujad gaya

mujh ko ehsas-e-rang-o-bu na hua yun bhi aksar bahaar aai hai

is taraf se guzre the qafile bahaaron ke aaj tak sulagte hain zakhm rahguzaron ke

khushi ke phul khile the tumhaare sath kabhi phir is ke ba'd na aaya bahaar ka mausam

jab se chhuta hai gulistan hum se roz sunte hain bahaar aai hai

tere qurban 'qamar' munh sar-e-gulzar na khol sadqe us chand si surat pe na ho jae bahaar

ye sochte hi rahe aur bahaar khatm hui kahan chaman mein nasheman bane kahan na bane i kept contemplating, spring came and went away where in the garden should i make my nest today

kahiyo saba salam hamara bahaar se hum to chaman ko chhod ke su-e-qafas chale

bahaar aai ki din holi ke aae gulon mein rang khela ja raha hai

ajab bahaar dikhai lahu ke chhinton ne khizan ka rang bhi rang-e-bahaar jaisa tha

khizan ka bhes bana kar bahaar ne mara mujhe do-rangi-e-lail-o-nahaar ne mara

tinkon se khelte hi rahe aashiyan mein hum aaya bhi aur gaya bhi zamana bahaar ka

tadap ke rah gai bulbul qafas mein ai sayyaad ye kya kaha ki abhi tak bahaar baqi hai

meri bahaar mein aalam khizan ka rahta hai hua jo wasl to khatka raha judai ka

aaj hai wo bahaar ka mausam phul todun to hath jam aae

shakhon se barg-e-gul nahin jhadte hain bagh mein zewar utar raha hai urus-e-bahaar ka

udhar bhi khak udi hai idhar bhi khak udi jahan jahan se bahaaron ke karwan nikle

ai khizan bhag ja chaman se shitab warna fauj-e-bahaar aawe hai

jo thi bahaar to gate rahe bahaar ka rag khizan jo aai to hum ho gae khizan ki taraf