Top 20 Sher by Abbas Tabish

ek muddat se meri man nahin soi 'tabish' main ne ek bar kaha tha mujhe dar lagta hai

ye mohabbat ki kahani nahin marti lekin log kirdar nibhate hue mar jate hain

jis se puchhen tere bare mein yahi kahta hai khubsurat hai wafadar nahin ho sakta

masruf hain kuchh itne ki hum kar-e-mohabbat aaghaz to kar lete hain jari nahin rakhte

agar yunhi mujhe rakkha gaya akele mein baramad aur koi is makan se hoga

mere sine se zara kan laga kar dekho sans chalti hai ki zanjir-zani hoti hai

jhonke ke sath chhat gai dastak ke sath dar gaya taza hawa ke shauq mein mera to sara ghar gaya

ek mohabbat aur wo bhi nakaam mohabbat lekin is se kaam chalaya ja sakta hai

tum mang rahe ho mere dil se meri khwahish bachcha to kabhi apne khilaune nahin deta

main use dekh ke lauta hun to kya dekhta hun shahr ka shahr mujhe dekhne aaya hua hai

main jis sukun se baitha hun is kinare par sukun se lagta hai mera qayam aakhiri hai

mohabbat ek dam dukh ka mudawa kar nahin deti ye titli baithti hai zakhm par aahista aahista

bolta hun to mere hont jhulas jate hain us ko ye baat batane mein badi der lagi

ye zindagi kuchh bhi ho magar apne liye to kuchh bhi nahin bachchon ki shararat ke alawa

na khwab hi se jagaya na intizar kiya hum is dafa bhi chale aae chum kar us ko

un aankhon mein kudne walo tum ko itna dhyan rahe wo jhilen payab hain lekin un ki tah pathrili hai

waqt lafzon se banai hui chadar jaisa odh leta hun to sab khwab hunar lagta hai

ye to ab ishq mein ji lagne laga hai kuchh kuchh is taraf pahle-pahal gher ke laya gaya main

pas-e-ghubar bhi udta ghubar apna tha tere bahane hamein intizar apna tha

'tabish' jo guzarti hi nahin sham ki had se sochen to wahin raat sahar-khez bahut hai