Top 20 Sher by Rajinder Manchanda Bani

wo tutte hue rishton ka husn-e-akhir tha ki chup si lag gai donon ko baat karte hue

ai dost main khamosh kisi dar se nahin tha qail hi teri baat ka andar se nahin tha

os se pyas kahan bujhti hai musla-dhaar baras meri jaan

'bani' zara sambhal ke mohabbat ka mod kat ek hadsa bhi tak mein hoga yahin kahin

dhalegi sham jahan kuchh nazar na aaega phir is ke ba'd bahut yaad ghar ki aaegi

zara chhua tha ki bas ped aa gira mujh par kahan khabar thi ki andar se khokhla hai bahut

udas sham ki yaadon bhari sulagti hawa hamein phir aaj purane dayar le aai

aaj kya lautte lamhat mayassar aae yaad tum apni inayat se badh kar aae

din ko daftar mein akela shab bhare ghar mein akela main ki aks-e-muntashir ek ek manzar mein akela

is qadar khali hua baitha hun apni zat mein koi jhonka aaega jaane kidhar le jaega

tu koi gham hai to dil mein jagah bana apni tu ek sada hai to ehsas ki kaman se nikal

na jaane kal hon kahan sath ab hawa ke hain ki hum parinde maqamat-e-gum-shuda ke hain

wo hanste khelte ek lafz kah gaya 'bani' magar mere liye daftar khula maani ka

hari sunahri khak udane wala main shafaq shajar taswir banane wala main

koi bhuli hui shai taq-e-har-manzar pe rakkhi thi sitare chhat pe rakkhe the shikan bistar pe rakkhi thi

wahi ek mausam-e-saffak tha andar bhi bahar bhi ajab sazish lahu ki thi ajab fitna hawa ka tha

chalo ki jazba-e-izhaar chikh mein to dhala kisi tarah ise aakhir ada bhi hona tha

thi panw mein koi zanjir bach gae warna ram-e-hawa ka tamasha yahan raha hai bahut

koi gosha khwab ka sa dhund hi lete the hum shahr apna shahr 'bani' be-aman aisa na tha

paiham mauj-e-imkani mein agla panw nae pani mein