Top 20 Sher by Shakeb Jalali

tu ne kaha na tha ki main kashti pe bojh hun aankhon ko ab na dhanp mujhe dubte bhi dekh

bad-qismati ko ye bhi gawara na ho saka hum jis pe mar mite wo hamara na ho saka

aaj bhi shayad koi phulon ka tohfa bhej de titliyan mandla rahi hain kanch ke gul-dan par

socho to silwaton se bhari hai tamam ruh dekho to ek shikan bhi nahin hai libas mein

jati hai dhup ujle paron ko samet ke zakhmon ko ab ginunga main bistar pe let ke

ye ek abr ka tukda kahan kahan barse tamam dasht hi pyasa dikhai deta hai

log dete rahe kya kya na dilase mujh ko zakhm gahra hi sahi zakhm hai bhar jaega

mujhe girna hai to main apne hi qadmon mein girun jis tarah saya-e-diwar pe diwar gire

malbus khush-numa hain magar jism khokhle chhilke saje hon jaise phalon ki dukan par

kya kahun dida-e-tar ye to mera chehra hai sang kat jate hain barish ki jahan dhaar gire

yun to sara chaman hamara hai phul jitne bhi hain parae hain

fasil-e-jism pe taza lahu ke chhinte hain hudud-e-waqt se aage nikal gaya hai koi

utar ke naw se bhi kab safar tamam hua zamin pe panw dhara to zamin chalne lagi

na itni tez chale sar-phiri hawa se kaho shajar pe ek hi patta dikhai deta hai

jahan talak bhi ye sahra dikhai deta hai meri tarah se akela dikhai deta hai

aa ke patthar to mere sehn mein do-chaar gire jitne us ped ke phal the pas-e-diwar gire

log dushman hue usi ke 'shakeb' kaam jis mehrban se nikla

jo motiyon ki talab ne kabhi udas kiya to hum bhi rah se kankar samet lae bahut

aalam mein jis ki dhum thi us shahkar par dimak ne jo likhe kabhi wo tabsire bhi dekh

gale mila na kabhi chand bakht aisa tha hara-bhara badan apna darakht aisa tha