Raushni

chand bhi hairan dariya bhi pareshani mein hai aks kis ka hai ki itni raushni pani mein hai

andheron ko nikala ja raha hai magar ghar se ujala ja raha hai

bahut sukun se rahte the hum andhere mein fasad paida hua raushni ke aane se

nahin hai mere muqaddar mein raushni na sahi ye khidki kholo zara subh ki hawa hi lage

ulfat ka hai maza ki 'asar' gham bhi sath hon tarikiyan bhi sath rahen raushni ke sath

raushni phaili to sab ka rang kala ho gaya kuchh diye aise jale har-su andhera ho gaya

raushan-dan se dhup ka tukda aa kar mere pas gira aur phir suraj ne koshish ki mujh se aankh milane ki

raushni mujh se gurezan hai to shikwa bhi nahin mere gham-khane mein kuchh aisa andhera bhi nahin

ghar se bahar nahin nikla jata raushni yaad dilati hai teri

raushni mein apni shakhsiyat pe jab bhi sochna apne qad ko apne sae se bhi kam-tar dekhna

dalil-e-tabish-e-iman hai kufr ka ehsas charagh sham se pahle jala nahin karte

khud hi parwane jal gae warna shama jalti hai raushni ke liye the moths got burned in their own plight the flame just burns to shed some light

numud-e-subh se shab ki wo tirgi to gai ye aur baat ki suraj mein raushni kam hai

kahin koi charagh jalta hai kuchh na kuchh raushni rahegi abhi

dete nahin sujhai jo duniya ke khatt-o-khal aae hain tirgi mein magar raushni se hum

ek surud-e-raushani nima-e-shab ka khwab tha ek khamosh tirgi saneha-ashna bhi thi

raushni jab se mujhe chhod gai shama roti hai sirhane mere

nai sahar ke hasin suraj tujhe gharibon se wasta kya jahan ujala hai sim-o-zar ka wahin teri raushni milegi

anginat safinon mein dip jagmagate hain raat ne lutaya hai rang-o-nur pani par

manzaron se bahalna zaruri nahin ghar se bahar nikalna zaruri nahin dil ko raushan karo raushani ne kaha raushni ke liye ek taza ghazal

sawal ye hai raushni wahan pe rok di gai jahan pe har kisi ke hath mein naya charagh tha

ghutan to dil ki rahi qasr-e-marmarin mein bhi na raushni se hua kuchh na kuchh hawa se hua

chand hai tera ham-safar koi nahin hai rahbar aage qadam badha ke rakh dur ki raushni na dekh

andhere chhu nahin sakte hain mujh ko ki mere sath teri raushni hai

raushni ki agar alamat hai rakh udti hai kyun sharare par

aankh se kis ne raushni mangi khwab ke nam zindagi mangi

be-kasi ke dard ne lau di jal uttha ek charagh rafta rafta us se phir sara jahan raushan hua

dalil-e-tabish-e-iman hai kufr ka ehsas charagh sham se pahle jala nahin karte

andheron mein rahe par mange ke ujalon se ghar apna hum ne kabhi zau-fishan kiya hi nahin

aur agar ho na sake kuchh bhi ujalon ki sabil ek charagh apne lahu se hi jala den hum log