Top 20 Sher by Saba Akbarabadi

apne jalne mein kisi ko nahin karte hain sharik raat ho jae to hum shama bujha dete hain

samjhega aadmi ko wahan kaun aadmi banda jahan khuda ko khuda manta nahin

ek roz chhin legi hamin se zamin hamein chhinenge kya zamin ke khazane zamin se hum

aap ke lab pe aur wafa ki qasam kya qasam khai hai khuda ki qasam

ghalat-fahmiyon mein jawani guzari kabhi wo na samjhe kabhi hum na samjhe

sau bar jis ko dekh ke hairan ho chuke ji chahta hai phir use ek bar dekhna

kab tak najat paenge wahm o yaqin se hum uljhe hue hain aaj bhi duniya o din se hum

achchha hua ki sab dar-o-diwar gir pade ab raushni to hai mere ghar mein hawa to hai

raushni khud bhi charaghon se alag rahti hai dil mein jo rahte hain wo dil nahin hone pate

aaina kaisa tha wo sham-e-shakebai ka samna kar na saka apni hi binai ka

aisa bhi koi gham hai jo tum se nahin paya aisa bhi koi dard hai jo dil mein nahin hai

gham-e-dauran ko badi chiz samajh rakkha tha kaam jab tak na pada tha gham-e-jaanan se hamein

khwahishon ne dil ko taswir-e-tamanna kar diya ek nazar ne aaine mein aks gahra kar diya

kamal-e-zabt mein yun ashk-e-muztar tut kar nikla asir-e-gham koi zindan se jaise chhut kar nikla

ishq aata na agar rah-numai ke liye aap bhi waqif-e-manzil nahin hone pate

kab tak yaqin ishq hamein khud na aaega kab tak makan ka haal kahenge makin se hum

azal se aaj tak sajde kiye aur ye nahin socha kisi ka aastan kyun hai kisi ka sang-e-dar kya hai

rawan hai qafila-e-ruh-e-iltifat abhi hamari rah se hat jae kaenat abhi

gae the naqd-e-giran-maya-e-khulus ke sath kharid lae hain sasti adawaten kya kya

jab ishq tha to dil ka ujala tha dahr mein koi charagh nur-badaman nahin hai ab