Eid

eid ka chand tum ne dekh liya chand ki eid ho gai hogi

eid ka din hai gale aaj to mil le zalim rasm-e-duniya bhi hai mauqa bhi hai dastur bhi hai

tujh ko meri na mujhe teri khabar jaegi eid ab ke bhi dabe panw guzar jaegi

hum ne tujhe dekha nahin kya eid manaen jis ne tujhe dekha ho use eid mubarak

jis taraf tu hai udhar hongi sabhi ki nazren id ke chand ka didar bahana hi sahi

eid aai tum na aae kya maza hai eid ka eid hi to nam hai ek dusre ki did ka

falak pe chand sitare nikalte hain har shab sitam yahi hai nikalta nahin hamara chand

dekha hilal-e-eid to aaya tera khayal wo aasman ka chand hai tu mera chand hai

mil ke hoti thi kabhi eid bhi diwali bhi ab ye haalat hai ki dar dar ke gale milte hain

us se milna to use eid-mubarak kahna ye bhi kahna ki meri eid mubarak kar de

ai hawa tu hi use eid-mubarak kahiyo aur kahiyo ki koi yaad kiya karta hai

kahte hain eid hai aaj apni bhi eid hoti hum ko agar mayassar jaanan ki did hoti

jo log guzarte hain musalsal rah-e-dil se din eid ka un ko ho mubarak tah-e-dil se

eid ka din hai so kamre mein pada hun 'aslam' apne darwaze ko bahar se muqaffal kar ke

us mehrban nazar ki inayat ka shukriya tohfa diya hai eid pe hum ko judai ka

mah-e-nau dekhne tum chhat pe na jaana hargiz shahr mein eid ki tarikh badal jaegi

id ke ba'd wo milne ke liye aae hain id ka chand nazar aane laga id ke baad

eid ab ke bhi gai yunhi kisi ne na kaha ki tere yar ko hum tujh se mila dete hain

wadon hi pe har roz meri jaan na talo hai eid ka din ab to gale hum ko laga lo

shahr khali hai kise eid mubarak kahiye chal diye chhod ke makka bhi madina wale

dekha hilal-e-id to tum yaad aa gae is mahwiyat mein id hamari guzar gai

aaj yaron ko mubarak ho ki subh-e-eid hai rag hai mai hai chaman hai dilruba hai did hai

eid tu aa ke mere ji ko jalawe afsos jis ke aane ki khushi ho wo na aawe afsos

mahak uthi hai faza pairahan ki khushbu se chaman dilon ka khilane ko eid aai hai

hai eid ka din aaj to lag jao gale se jate ho kahan jaan meri aa ke muqabil

id ka din to hai magar 'jafar' main akele to hans nahin sakta

hasil us mah-laqa ki did nahin eid hai aur hum ko eid nahin

eid ka chand jo dekha to tamanna lipti un se taqrib-e-mulaqat ka rishta nikla

tu aae to mujh ko bhi id ka chand dikhai de

abru ka ishaara kiya tum ne to hui id ai jaan yahi hai mah-e-shawwal hamara