Parinda

nikal laya hun ek pinjre se ek parinda ab is parinde ke dil se pinjra nikalna hai

tum parindon se ziyaada to nahin ho aazad sham hone ko hai ab ghar ki taraf laut chalo

ek parinda abhi udan mein hai tir har shakhs ki kaman mein hai

bichhad ke tujh se na dekha gaya kisi ka milap uda diye hain parinde shajar pe baithe hue

ab to chup-chap sham aati hai pahle chidiyon ke shor hote the

mujhe malum hai us ka thikana phir kahan hoga parinda aasman chhune mein jab nakaam ho jae

parind shakh pe tanha udas baitha hai udan bhul gaya muddaton ki bandish mein

ye parinde bhi kheton ke mazdur hain laut ke apne ghar sham tak jaenge

kuchh ehtiyat parinde bhi rakhna bhul gae kuchh intiqam bhi aandhi ne badtarin liye

ajib dard ka rishta tha sab ke sab roe shajar gira to parinde tamam shab roe

parinde dur fazaon mein kho gae 'alwi' ujad ujad darakhton pe aashiyane the

jaane kya kya zulm parinde dekh ke aate hain sham dhale pedon par marsiya-khwani hoti hai

parind unchi udanon ki dhun mein rahta hai magar zamin ki hadon mein basar bhi karta hai

parind ped se parwaz karte jate hain ki bastiyon ka muqaddar badalta jata hai

ye rang rang parinde hi hum se achchhe hain jo ek darakht pe rahte hain beliyon ki tarah

parind kyun meri shakhon se khauf khate hain ki ek darakht hun aur saya-dar main bhi hun

ye taeron ki qataren kidhar ko jati hain na koi dam bichha hai kahin na dana hai

reg-e-dil mein kai nadida parinde bhi hain dafn sochte honge ki dariya ki ziyarat kar jaen

jaane kya soch ke phir in ko rihai de di hum ne ab ke bhi parindon ko tah-e-dam kiya

hum parindon se hunar chhinega kaun jal gaya ek ghar to sau ghar ban gae

ghol ke ghol mere sahn mein aa baithte hain ye parinde mujhe hijrat nahin karne dete

palat gae jo parinde to phir gila kya hai har ek shakh-e-shajar par bichhe hain jal bahut

zarur aman ka paigham le gaya tha kahin parinda lauta liye par lahu mein dube hue

udanen bharne wale ye parinde numainda teri raftar ke hain

ye parinde jo munderon pe khuli dhup mein hain baal-o-par apne sukhaenge chale jaenge

baat pedon ki nahin, gham hai parindon ka 'nadim' ghonsle jin ke koi tod diya karta tha

koi 'faza' to mile hum ko qabil-e-parwaz ab in hadon mein bhala baal-o-par kahan kholen

hamari ruh parindon ko saunp di jae ki ye badan to gunahgar ho gae sahib

sehn-e-gulshan mein kai dam bichhe hain ai 'asar' ud ke jaun bhi agar main to kidhar jaunga

parinde bhi hamd-o-sana kar rahe hain magar tu ba-waqt-e-azan so raha hai