Mazi

yaad-e-mazi 'azab hai ya-rab chhin le mujh se hafiza mera

mazi-e-marhum ki nakaamiyon ka zikr chhod zindagi ki fursat-e-baqi se koi kaam le

yaadon ki bauchhaaron se jab palken bhigne lagti hain sondhi sondhi lagti hai tab mazi ki ruswai bhi

band kar de koi mazi ka daricha mujh par ab is aaine mein surat nahin dekhi jati

ishq ki har dastan mein ek hi nukta mila ishq ka mazi hua karta hai mustaqbil nahin in every tale of love is a common theme to wit love only has a past but no future's there for it

kabhi milenge jo raste mein to munh phira kar palat padenge kahin sunenge jo nam tera to chup rahenge nazar jhuka ke

wo mazi jo hai ek majmua ashkon aur aahon ka na jaane mujh ko is mazi se kyun itni mohabbat hai

hansi mein katti thin raaten khushi mein din guzarta tha 'kanwal' mazi ka afsana na tum bhule na hum bhule

kuredta hai bahut rakh mere mazi ki main chuk jaun to wo ungliyan jala lega

kai na-ashna chehre hijabon se nikal aae nae kirdar mazi ki kitabon se nikal aae

tamiz-e-khwab-o-haqiqat hai shart-e-bedari khayal-e-azmat-e-mazi ko chhod haal ko dekh

mazi se ubhrin wo zinda taswiren utar gaya sab nashsha nae purane ka

yaad-e-mazi ki pur-asrar hasin galiyon mein mere hamrah abhi ghum raha hai koi

tahni pe khamosh ek parinda mazi ke ulat raha hai daftar

allah-re be-khudi ki chala ja raha hun main manzil ko dekhta hua kuchh sochta hua

ye jo mazi ki baat karte hain sochte honge haal se aage

hasrat-e-dil na-mukammal hai kitab-e-zindagi jod de mazi ke sab auraq mustaqbil ke sath

mazi ke reg-zar pe rakhna sambhal ke panw bachchon ka is mein koi gharaunda bana na ho

un ko bhule zamana hota hai ashk aankhon mein phir bhi bhar aae