Chehra

kya sitam hai ki ab teri surat ghaur karne pe yaad aati hai

teri surat se kisi ki nahin milti surat hum jahan mein teri taswir liye phirte hain

ai sanam jis ne tujhe chand si surat di hai usi allah ne mujh ko bhi mohabbat di hai

wo chehra kitabi raha samne badi khubsurat padhai hui

wo ek hi chehra to nahin sare jahan mein jo dur hai wo dil se utar kyun nahin jata

ajab teri hai ai mahbub surat nazar se gir gae sab khubsurat

tera chehra kitna suhana lagta hai tere aage chand purana lagta hai

achchhi surat bhi kya buri shai hai jis ne dali buri nazar dali

shabnam ke aansu phul par ye to wahi qissa hua aankhen meri bhigi hui chehra tera utra hua

koi bhula hua chehra nazar aae shayad aaina ghaur se tu ne kabhi dekha hi nahin

chehra khuli kitab hai unwan jo bhi do jis rukh se bhi padhoge mujhe jaan jaoge

ab us ki shakl bhi mushkil se yaad aati hai wo jis ke nam se hote na the juda mere lab

ek raat chandni mere bistar pe aai thi main ne tarash kar tera chehra bana diya

main to 'munir' aaine mein khud ko tak kar hairan hua ye chehra kuchh aur tarah tha pahle kisi zamane mein

bhul gai wo shakl bhi aakhir kab tak yaad koi rahta hai

rahta tha samne tera chehra khula hua padhta tha main kitab yahi har class mein

kyun jal gaya na tab-e-rukh-e-yar dekh kar jalta hun apni taqat-e-didar dekh kar why didn't i turn to ashes seeing her face so glowing, bright by envy now i am inflamed, at strength of my own sight the poet expresses a paradox where his survival is a source of shame. he believes the beloved's beauty is so intense it should have annihilated him instantly; the fact that he survived proves he has an unfortunate resilience. he burns now not from the beauty itself, but from the realization that he had the audacity and strength to withstand it without dying.

un ki surat dekh li khush ho gae un ki sirat se hamein kya kaam hai

bade sidhe-sadhe bade bhole-bhaale koi dekhe is waqt chehra tumhaara

abr mein chand gar na dekha ho rukh pe zulfon ko dal kar dekho

tashbih tere chehre ko kya dun gul-e-tar se hota hai shagufta magar itna nahin hota

khwabon ke ufuq par tera chehra ho hamesha aur main usi chehre se nae khwab sajaun

chandni raaton mein chillata phira chand si jis ne wo surat dekh li

us ek chehre mein aabaad the kai chehre us ek shakhs mein kis kis ko dekhta tha main

ishq hai to ishq ka izhaar hona chahiye aap ko chehre se bhi bimar hona chahiye

bhula din hum ne kitaben ki us pari-ru ke kitabi chehre ke aage kitab hai kya chiz

tu ne surat na dikhai to ye surat hogi log dekhenge tamasha tere diwane ka

us ek chehre ke pichhe hazar chehre hain hazar chehron ka wo qafila sa lagta hai

kitab khol ke dekhun to aankh roti hai waraq waraq tera chehra dikhai deta hai

aa ki main dekh lun khoya hua chehra apna mujh se chhup kar meri taswir banane wale